اسلام آباد۔ 16 جون (اے پی پی) نائب وزیراعظم تے وزیر خارجہ سینیٹر محمد اسحاق ݙار آکھیا اے جو اساں ملکی دفاع اتے سلامتی تے کوئی سمجھوتہ نہ کریسوں، اساں بھارتی جارحیت دا منہ ٻھن جواب ݙیتا اتے ہݨ وی کہیں جارحیت کیتی تاں ایں شدت نال جواب ݙیسوں، پاکستان دی خارجہ پالیسی اصولاں اتے قومی مفادات دی بنیاد تے استوار اے اتے اساں کہیں وی اندرونی یا بیرونی دباؤ کوں خاطر اچ گھدے بغیر قومی خودمختاری دا دفاع جاری رکھیسوں، ایرانی زائرین دی سعودی عرب توں وطن واپسی سانگے ہر ممکن تعاون ݙیسوں۔ سنوار کوں ایوان بالا دے اجلاس اچ سینیٹر اسحاق ݙار آکھیا جو پاکستان اینٹ دا جواب پتھر نال ݙیوݨ جانڑدے اتے حال ای اچ ایں دا عملی مظاہرہ ہک وݙے دشمن دے خلاف کر چکیے۔ انہاں آکھیا جو اسرائیل دی جرأت نی جو او پاکستان دے خلاف کوئی کارروائی کر سڳے، پاکستانی قوم متحد ہئی، اے اتے ہمیشہ رہیسی۔ انہاں پاکستان دے ایٹمی پروگرام کوں قوم دی امانت قرار ݙیندیں ہوئیں آکھیا جو اے پروگرام پاکستانی عوام بے شمار قربانیاں نال حاصل کیتے اتے ایں دی حفاظت ہر قیمت تے کیتی ویسی۔ چیئرمین سینیٹ سید یوسف رضا گیلانی ولوں وزارت خارجہ اچ ترجمان مقرر کرݨ دے ریمارکس دے حوالے نال سینیٹر اسحاق ݙار آکھیا جو وزارت خارجہ اچ گریڈ 21 دے ہک افسر کوں تعینات کیتا ڳئے جو دفتر خارجہ دے ایڈیشنل سیکرٹری ہووݨ دے نال نال وزارت دے سرکاری ترجمان دے فرائض وی انجام ݙیندے پئن۔ انہاں آکھیا جو پاکستان دی خارجہ پالیسی اصولاں اتے قومی مفادات دی بنیاد تے استوار اے اتے اساں کہیں وی اندرونی یا بیرونی دباؤ کوں خاطر اچ گھنڑ بغیر قومی خودمختاری دا دفاع جاری رکھیسوں۔ انہاں آکھیا جو ملک اچ جعلی خبراں دی بھرمار اے، سارے کوں چاہیدا اے جو او کہیں وی چیز کوں پھیلݨ توں پہلے ایں متعلق تصدیق کر گھنن، پاکستان ہک ذمہ وار ملک اے اتے عالمی سطح تے ذمہ وارانہ کردار ادا کریندا پئے۔ نائب وزیراعظم اتے وزیر خارجہ سینیٹر اسحاق ݙار حالیہ علاقائی کشیدگی اتے سوشل میڈیا تے پھیلݨ آلیاں غلط معلومات تے آکھیا جو بھارت نال حالیہ تنازعہ دے دوران سوشل میڈیا تے فیک نیوز اتے جعلی ویڈیوز دا سہارا ڳھنݨ ڳیا۔ انہاں ݙسایا جو وزارت اطلاعات سودھے مختلف ادارے انہاں غلط معلومات دی روک تھام سانگے متحرک ہن۔ انہاں انکشاف کیتا جو گزریل ݙینھ خواجہ آصف توں منسوب ہک بیان دے نال سابق امریکی صدر ڈونلڈ ٹرمپ دی جعلی ویڈیو کلپ، مصنوعی ذہانت دے ذریعے تیار کر تے سوشل میڈیا تے پھیلائی ڳئی جو مکمل طور تے کوڑ ہئی۔ ایں موقع تے انہاں خبردار کیتا جو اے ٻالاں دا کھیل نی رہیا بلکہ ہݨ اے ہک سنجیدہ نوعیت دی ہائبرڈ جنگ اے۔ اسحاق ݙار آکھیا جو ایران اتے امریکا وچال مذاکرات جاری ہن جنہاں اچ پاکستان وی ہک ذمہ وار ثالث دے طور تے شامل رہیا، روم اتے مسقط اچ مذاکرات تھیندے پئے ہن، 15 جون کوں وی ملاقات طے ہئی مگر 13 جون کوں اچانک صورتحال خراب کر ݙتی ڳئی، ایرانی وزیر خارجہ ایں اچ پاکستان کوں مکمل اعتماد اچ گھنڑ اتے اقوام متحدہ دی سکیورٹی کونسل اچ پاکستان دے کردار دی تعریف کیتی۔ وزیر خارجہ آکھیا جو ایران اچ موجود پاکستانی طلباء اتے زائرین دے تحفظ سانگے حکومت سرگرم عمل اے۔ انہاں ݙسایا جو 51 پاکستانی طلباء اج وطن واپس پڄدے پئن، 500 زائرین دی واپسی دا عمل وی جاری اے، ایرانی حجاج کوں ویزا ݙے تے کراچی منتقل کیتا ویسی۔ انہاں سعودی عرب دے فیصلے دا وی حوالہ ݙیتا جو اتھاں 20 ہزار حجاج کوں موجودہ کشیدہ صورتحال دے پیش نظر اوتھاں ای روکݨ دا فیصلہ کیتا ڳیا اے۔ اسحاق ݙار سختی نال انہاں خبراں دی تردید کیتی جو ایران دے ہک جنرل توں منسوب کیتیاں ڳئیاں جنہاں اچ آکھیا ڳیا ہئی جو اگر ایران تے ایٹمی حملہ تھییا تاں پاکستان اسرائیل تے جوابی حملہ کریسی۔ انہاں آکھیا جو اے محض کوڑ اے۔ ایویں اسرائیلی وزیراعظم نیتن یاہو دی پاکستان دے حوالے نال گردش کرݨ آلی ویڈیو دے بارے اچ انہاں واضح کیتا جو او 2011 دی پراݨی ویڈیو اے جیں کوں حالیہ سیاق اچ غلط انداز نال پیش کیتا ویندا پئے۔ اسحاق ڈار آکھیا جو اساں بھارت کوں بھرپور جواب ݙتا لیکن نال ای ہک ذمہ وار ریاست ہوݨ دا ثبوت وی ݙتا، پاکستان نہ صرف آپݨے دفاع سانگے تیار اے بلکہ خطے اچ امن اتے استحکام سانگے ہر ممکن کردار ادا کریندا رہسی۔ سینٹ اچ قائد حزب اختلاف شبلی فراز آکھیا جو ایٹمی پاکستان دنیا دیاں اکھاں اچ کھرکدا اے، اساکوں ہر ویلھے تیار رہݨا چاہیدے۔
