اسلام آباد۔ 16 جون (اے پی پی) وزیراعظم محمد شہباز شریف آکھیا اے جو پاکستان عالمی امن اتے علاقائی استحکام سانگے پرعزم اے، بلیو اکانومی اچ سرمائے دے حصول، تجارت دے فروغ اتے پائیدار اتے جامع ترقی دے مواقع موجود ہن، ملک اچ بلیو اکانومی دے فروغ سانگے سارے متعلقہ فریقاں نال رل تے ہر ممکن اقدامات کیتے ویسن۔ اے ڳالھیں انہاں انٹرنیشنل میری ٹائم ایکسپو اینڈ کانفرنس دی سافٹ لانچ تقریب نال خطاب کریندیں ہوئیں کیتا۔ تقریب اچ پاک بحریہ دے سربراہ ایڈمرل نوید اشرف وی شریک ہن۔ وزیراعظم محمد شہباز شریف آکھیا جو ایں اہم کانفرنس دے انعقاد اچ وفاقی وزیر برائے بحری امور جنید انوار چوہدری اتے پاک بحریہ دے سربراہ ایڈمرل نوید اشرف دی شاندار قیادت قابل تعریف اے، پاک بحریہ قومی دفاع اچ اہم ستون اے، بھاویں 1965 اچ آپریشن دوارکا ہووے یا بھارت دی حالیہ جارحیت، پاک بحریہ ہمیشہ آپݨیں جدید انداز اچ تیاریاں اتے غیر متزلزل پیشہ وارانہ صلاحیت کوں ثابت کیتے۔ انہاں آکھیا جو پاکستان عالمی امن، علاقائی استحکام اتے بین الاقوامی اقدار تے عمل درآمد سانگے پرعزم اے جو اساݙی سمندری سفارت کاری کوں رہنمائی ݙیندی اے۔ انہاں آکھیا جو حالیہ امن مشقاں اچ 16 ملکاں شرکت کیتی، ہک ہزار توں ودھ کلومیٹر کوسٹل لائن، ترائے اہم بندرگاہیں اتے سٹریٹجک جیوگرافی اتے اہم عالمی سمندری رستہ ہووݨ دے باعث پاکستان دا منفرد مقام اے، اساکوں آپݨیں سمندری شعبے دیاں صلاحیتاں توں بھرپور فیدہ چاوݨا چاہیدے، بلیو اکانومی کوں پاکستانی معیشت دے فروغ اچ اہم مقام حاصل اے، ایں اچ سرمائے دے حصول، تجارت دے فروغ اتے پائیدار اتے جامع ترقی دے مواقع موجود ہن۔ وزیراعظم آکھیا جو بین الاقوامی بلیو اکانومی کھرباں ڈالر تے مشتمل اے، پاکستان دی قومی ترقی اتے علاقائی روابط سانگے بلیو اکانومی دی صلاحیت گیم چینجر دی حیثیت رکھیندی اے۔ انہاں آکھیا جو بلیو اکانومی اچ جہاز سازی، فشریز، قابل تجدید توانائی دی ری سائیکلنگ، ساحلی سیاحت دے وسیع مواقع موجود ہن۔ انہاں آکھیا جو سالانہ مال برداری اخراجات تقریباً 7 ارب ڈالر ہن، پاکستانی شپنگ کمپنیاں اتے غیر ملکی شپنگ کمپنیاں وچال صحت مند مقابلہ تھیونڑ چاہیدا اے۔ انہاں آکھیا جو جاپان توں اساکوں سکھنڑ دی لوڑ اے جیڑھا کئی چیلنجاں دے باوجود آپنڑیں پرعزم ردعمل دے ذریعے آپنڑاں مستقبل دا تعین کیتا، جغرافیائی مسائل اتے محدود وسائل دے باوجود جاپان جدید بندرگاہیں دے انفراسٹرکچر، جدید جہاز سازی اتے پائیدار سمندری وسائل دے ذریعے عالمی بحری مرکز بن ڳیا، ایں توں ثابت تھیندا اے جو بلیو اکانومی توں متعلق مربوط حکمت عملی اتے ٹیکنالوجی تے مبنی جدت اتے علاقائی اثر و رسوخ ملک دی ترقی سانگے اہم ستون بن چکے ہن۔ انہاں ایں عزم دا اعادہ کیتا جو بلیو اکانومی دے فروغ سانگے ہر ممکن اقدامات کیتے ویسن، سارے متعلقہ فریقاں کوں میری ٹائم قوت کوں تبدیل کرنڑ سانگے رل تے کوششاں کرنڑیاں چاہیدن، اے ویلھے دی لوڑ اے، امید اے تساں پاکستانی عوام دیاں امیداں تے پورا لہسو۔ ایں موقع تے وفاقی وزیر برائے بحری امور جنید انوار چوہدری تقریب نال خطاب کریندے ہوئیں آکھیا جو اے کانفرنس تجارتی روابط اتے سرمایہ کاری دے حوالے نال اہمیت دی حامل ہوسی۔ ترقی دے عمل اچ بلیو اکانومی دے اہم کردار کوں نظر انداز نی کر سڳدے، پاکستان منفرد جغرافیائی محل وقوع دی وجہ توں پرکشش ملک اے، بلیو اکانومی دا فروغ حکومت دی اولین ترجیح اے، 2047 تک 100 ارب ڈالر دی بلیو اکانومی اساݙا ہدف اے۔
