اسلام آباد۔ 17 جون (اے پی پی) سپیکر قومی اسمبلی سردار ایاز صادق نال ازبکستان دے سفیر علی شیر تختایف منگل کوں پارلیمنٹ ہاؤس اچ ملاقات کیتی جئیں اچ ݙو پاسہ تعلقات، خطے دی صورتحال اتے آپسی دلچسپی دے معاملیاں تے گالھ مہاڑ کیتی ڳئی۔ ایں موقع تے گالھ مہاڑ کریندیں ہوئیں سپیکر آکھیا جو پاکستان اتے ازبکستان مذہب تے ثقافت دے لازوال رشتے اچ بدھیے ہوئین، پاکستان ازبکستان نال آپنڑیں برادرانہ اتے دوستانہ تعلقات کوں وݙی اہمیت ݙیندے۔ سپیکر قومی اسمبلی ݙوہاں برادر ملکاں دی پارلیماناں اچ رابطیاں کوں فروغ ݙیوݨ دی لوڑھ تے زور ݙتا اتے آکھیا جو پارلیمانی رابطے ݙوہاں ملکاں دی عوام کوں ہک ݙوجھے دے نیڑے گھن آوݨ اچ معاون ثابت ہوسن۔ پاکستان ݙو پاسہ پارلیمانی تے اقتصادی تعلقات کوں ٻیا مستحکم بݨاوݨ دا خواہشمند اے، قومی اسمبلی اچ قائم پاک-ازبک پارلیمانی فرینڈ شپ گروپ پارلیمانی رابطیاں دے فروغ اچ فعال کردار ادا کریندا پئے۔ ݙوہاں ملکاں اچ تجارتی اتے اقتصادی شعبیاں اچ تعاون کوں فروغ ݙیوݨ دے وسیع موقعے موجود ہن، پاکستان خطے اچ امن اتے پائیدار ترقی چاہندے۔ازبکستان دے سفیر علی شیر تختایف پاک-ازبک پارلیمانی رابطیاں دے فروغ سانگے سپیکر قومی اسمبلی دے کردار دی تعریف کیتی اتے آکھیا جو وزیراعظم پاکستان محمد شہباز شریف دا اڄوکا دورہ ازبکستان ہک اہم سنگ میل ثابت ہوسی، پاکستان خطے دا ہک اہم ملک اے، پاکستان دی سیاسی قیادت دا خطے دی ترقی اتے خوشحالی سانگے غیر متزلزل عزم قابل تعریف اے۔ ݙوہاں برادر ملکاں اچ تجارت اتے ٻئے اقتصادی شعبیاں اچ تعاون دے وسیع امکانات موجود ہن۔ ازبک سفیر سپیکر قومی اسمبلی سردار ایاز صادق کوں پارلیمانی وفد دے ہمراہ ازبکستان دے سرکاری دورے دی دعوت ݙیتی۔
