اسلام آباد۔ 17 جون (اے پی پی) صدر مملکت آصف علی زرداری نال وزیر اعظم محمد شہباز شریف منگل کوں اتھاں ملاقات کیتی۔ ایوان صدر دے پریس ونگ توں جاری بیان موجب ملاقات اچ ملک دی اڄوکی سیاسی اتے معاشی صورتحال تے گالھ مہاڑ تھئی۔ ملاقات وچ نائب وزیر اعظم محمد اسحاق ڈار، وفاقی وزیر برائے منصوبہ بندی، ترقی اتے خصوصی اقدامات احسن اقبال، وفاقی وزیر برائے قانون تے انصاف سینیٹر اعظم نذیر تارڑ اتے سینیٹر سلیم مانڈوی والا وی موجود ہن۔ وزیر اعظم صدر مملکت کوں آپݨے اڄوکے سرکاری دورہ متحدہ عرب امارات اتے وفاقی بجٹ بارے ݙسیا۔ ایں موقع تے صدر مملکت آکھیا جو وفاقی بجٹ وچ عام آدمی خاص کر محنت کشاں اتے گھٹ آمدݨ آلے طبقیاں دی فلاح و بہبود کوں ترجیح ݙتی ونجے۔ انہاں آکھیا جو بجٹ وچ تنخواہ دار، پینشنرز، مزدور اتے پسماندہ طبقیاں دے مسئلیاں دے حل کیتے موثر اقدامات دی لوڑھ اے۔ صدر مملکت آکھیا جو روزگار دے موقع پیدا کرݨ، غریب اتے کمزور طبقیاں دی معاونت کیتے سماجی تحفظ دی سکیمیں کوں ودھاوݨ دی لوڑھ اے۔
