اسلام آباد۔ 18 جون (اے پی پی) وزیر اعظم محمد شہباز شریف ے کیش لیس اکانومی اتے معیشت دی ڈیجیٹلائزیشن کیتے کمیٹی ٻݨا ݙتی اے، وزیر اعظم دی صدارت اچ ٻݨی اے کمیٹی ایں بارے اقدامات دا ہفتہ وار جائزہ گھنسی۔بدھ کوں وزیراعظم آفس دے میڈیا ونگ توں جاری بیان موجب وزیر اعظم محمد شہباز شریف دی صدارت غیر رسمی معیشت دے خاتمے، شفافیت دے فروغ اتے کیش لیس تے ڈیجیٹل اکانومی بارے اقدامات تے جائزہ اجلاس وزیر اعظم ہاؤس اسلام آباد وچ تھیا۔ اجلاس وچ وفاقی وزراء احد خان چیمہ، محمد اورنگزیب، شزہ فاطمہ خواجہ، وزیر مملکت برائے خزانہ بلال اظہر کیانی، چیئرمین ایف بی آر اتے متعلقہ اعلیٰ حکام شرکت کیتی۔اجلاس کوں کیش لیس اکانومی تے معیشت دی ڈیجیٹلائزیشن تے پیش رفت بارے بریفنگ ݙتی ڳئی۔ اجلاس کوں ݙسایا ڳیا جو ڈیجیٹل ادائیگیاں تے رقوم دی منتقلی کیتے تاجراں کوں ہدایات ݙتی ڳئی اے اتے عوامی سطح تے ایں دے فروغ کیتے اقدامات تیزی نال جاری ہن۔ اجلاس کوں وزارت انفارمیشن ٹیکنالوجی اتے وزارت خزانہ دے ایں حوالے نال اقدامات تے وی بریفنگ ݙتی ڳئی۔وزیر اعظم کیش لیس اکانومی دے فروغ اتے ڈیجیٹلائزیشن کوں تیز کرݨ کیتے اعلیٰ سطحی کمیٹی ٻݨا ݙتی اے جئیں دی صدارت وزیر اعظم خود کریسن۔ وزیر اعظم دی صدارت وچ اے کمیٹی ہفتہ وار اجلاس وچ معیشت دی ڈیجیٹلائزیشن اتے کیش لیس اکانومی دے فروغ کیتے چاتے ڳئے اقدامات دا جائزہ گھنسی۔وزیر اعظم آکھیا جو معیشت دی ڈیجیٹلائزیشن حکومت دیاں اصلاحات دی اولین ترجیحات وچ شامل اے، وفاقی بجٹ وچ کیش لیس اکانومی دے فروغ کیتے اقدامات تجویز کیتے ڳئے ہن۔ وزیر اعظم آکھیا جو غیر رسمی معیشت دے خاتمے اتے شفافیت کیتے کیش لیس خریداری تے رقوم دی منتقلی کیتے اقدامات کریندے پیوں، رمضان المبارک وچ شفاف، مؤثر اتے بہترین طریقے نال حقداراں کوں ڈیجیٹل والٹ نال رقم دی منتقلی یقینی ٻݨائی ڳئی۔وزیراعظم آکھیا جو ڈیجیٹل والٹ نال رقوم دی منتقلی نال حقدار کوں اوندا حق ملیا اتے بغیر کہیں انسانی مداخلت دے شفاف طریقے نال امدادی رقم تقسیم تھئی۔ معیشت دی بہتری دی بدولت مہنگائی دی شرح ڳھٹ اتے ترسیلات زر وچ ودھارا تھیا ۔ وزیراعظم آکھیا جو سٹاک مارکیٹ اچ کاروبار وچ تیزی سرمایہ داراں دے حکومت دی پالیسیاں تے اعتماد دا اظہار اے۔ اللہ دے فضل و کرم نال معاشی ٹیم دی محنت رنگ گھن آندی پئی اے۔ وزیراعظم ہدایت کیتی جو پالیسی اقدامات نال ڈیجیٹل ادائیگیاں اتے رقوم دی ڈیجیٹل منتقلی دی حوصلہ افزائی کیتی ونڄے۔
