استنبول۔ 18 جون (اے پی پی) ترکیہ دے صدر رجب طیب اردگان آکھیے جو اسرائیل دی طرفوں جاری بمباری دے جواب وچ ایران کوں اپݨے دفاع دا “فطری، جائز اتے قانونی” حق حاصل اے۔ اے ایف پی موجب ترک صدر آکھیے جو اسرائیل دی غنڈہ گردی اتے ریاستی دہشت گردی دے خلاف اپݨا دفاع ایران دا فطری، جائز اتے قانونی حق اے۔ترک صدر آکھیے جو اسرائیل دی طرفوں ایران دے خلاف حملیں دا آغاز ایں ویلھے تھئے جݙاں ایران اتے امریکا وچال جوہری مذاکرات جاری ہن۔ انہاں آکھیے جو اسرائیل جئیں کنے جوہری ہتھیار ہن اتے اوہ کہیں وی بین الاقوامی قانون کوں نئیں منیندا ، ایں ایران اتے امریکا وچال جاری مذاکرات دے ختم تھیوݨ دا وی انتظار نئیں کیتا بلکہ انہاں مذاکرات دے نتیجے دا انتظار کیتے بغیر دہشت گردی دی کارروائی کیتی۔ترک صدر آکھیے جو اساں ایران دے خلاف اسرائیل دے دہشت گردانہ حملیں تے جھکی نظر رکھی ہوئی اے، اساݙے سارے ادارے اسرائیلی حملیں دے ترکیہ تے ممکنہ اثرات دے حوالے نال ہائی الرٹ ہن۔ انہاں آکھیے جو اساں ہر طرح دے منظر نامے کیتے تیاریاں کریندے پیوں، کوئی وی اساݙا امتحان گھنݨ دی ہمت نہ کرے۔واضح رہے جو ہک ݙینھ پہلے ترک صدر اسرائیلی وزیر اعظم بنجمن نیتن یاہو کوں خطے دی سلامتی کیتے ساریں توں وݙا خطرہ قرار ݙتا ہئی۔ ایں توں پہلے سنوار کوں انہاں ترکیہ دی دفاعی صنعت کوں حکم ݙتے جو او درمیانے اتے لمبے فاصلے تئیں مار کرݨ آلے میزائلاں دی پیداوار وچ ودھارا کرے تاں جو اسرائیل اتے ایران وچال جنگ دے پس منظر وچ ترکیہ دی دفاعی صلاحیت دی سطح کوں ودھایا ونڄ سڳے۔
