اسلام آباد۔ 18 جون (اے پی پی) سپیکر قومی اسمبلی سردار ایاز صادق نال ہنگری دے سبکدوش تھیوݨ آلے سفیر بیلا فازیکاس پارلیمنٹ ہاؤس وچ الوداعی ملاقات کیتی۔ ملاقات وچ پاک-ہنگری ݙو طرفہ تعلقات سودھے سانجھی دلچسپی دے ݙوجھے امور تے ڳالھ مہاڑ کیتی ڳئی۔ایں موقع تے ڳالھ مہاڑ کریندے ہوئیں سپیکر ہنگری دے سفیر بیلا فازیکاس دیاں خدمات اتے مثبت کردار کوں خراج تحسین پیش کیتا اتے پاکستان-ہنگری تعلقات دے ودھارے ، پارلیمانی رابطے دی مضبوطی تے زور ݙتا۔ سپیکر آکھیے جو پاکستان اتے ہنگری وچال مختلف شعبیں وچ تعاون دے وسیع امکانات موجود ہن، پاکستانی پارلیمانی وفد دے اڄوکے دورہ ہنگری دے ݙورس نتیجے نکلسن۔ ݙوہیں رہنماواں پاکستان-ہنگری پارلیمانی فرینڈشپ گروپ کوں مزید فعال بݨاوݨ دی لوڑھ تے زور ݙتا۔سپیکر آکھیے جو خطے وچ امن کیتے بھارت دے نال ہمیشہ صبر و تحمل دی پالیسی اپنائی، جنگ نال ساریں توں ودھ ضیان عام شہریاں کوں تھیندے۔ ہنگری دے سفیر دا آکھݨ ہئی جو پاکستانی پارلیمانی وفد دا دورہ میݙیاں سفارتی خدمات دا یادگار لمحہ ہئی، مستقبل وچ پاکستان-ہنگری تعلقات مزید مستحکم تھیسن۔
