اسلام آباد۔ 18 جون (اے پی پی) وزیراعظم محمد شہباز شریف دی اڳواݨی اچ وزیراعظم ہاؤس اسلام آباد اچ وفاقی کابینہ دا اجلاس تھئے جیندے اچ قومی بجٹ تے نواں مالی دباؤ پاتے بغیر اگلے چھی سالاں اچ 1,275 ارب روپے دے گردشی قرضے ختم کرݨ کیتے پاکستان دی سب توں وݙی مالیاتی سکیم، کمال الدین ٹیپو کوں کمیشن برائے پروٹیکشن آف جرنلسٹس اینڈ میڈیا پروفیشنلز دا چیئرپرسن مقرر کرݨ، اَتے نیشنل پاور پارکس مینجمنٹ کمپنی لمیٹڈ کوں روش پاور پلانٹ گھنݨ سانڳے مختلف خدمتاں ملھ ڳھنݨ کیتے پاکستان پبلک پروکیورمنٹ ریگولیٹری اتھارٹی آرڈیننس 2002 دے سیکشن 21 دے تحت استثنیٰ ݙیوݨ دی منظوری ݙتی ڳئی۔ وزیراعظم اجلاس نال خطاب اچ آرمی چیف فیلڈ مارشل سید عاصم منیر دے دورہ امریکہ اچ امریکہ اچ وسݨ آلے پاکستانیاں نال خطاب دی تعریف کیتی اتے اوورسیز پاکستانی برادری نال خطاب اچ فیلڈ مارشل کوں پاکستان دیاں سرحداں اَتے مفادات دے دفاع کیتے انہاں دے پختہ عزم خراج تحسین پیش کیتا۔ وفاقی کابینہ آندے مالی سال دے عوام دوست وفاقی بجٹ تے وفاقی وزیر خزانہ محمد اورنگزیب اَتے انہاں دی ٹیم کوں خراج مبارک ݙتی۔ وزیراعظم ایں سال حج بیت اللہ دے موقع تے شاندار انتظامات تے وفاقی وزیر مذہبی امور سردار یوسف کوں وی خراج تحسین پیش کیتا۔ پاور سیکٹر دے گردشی قرضے دے خاتمے دے حوالے نال، وفاقی کابینہ پاور سیکٹر اچ مالیاتی استحکام بحال کرݨ دا ہک تاریخی قدم چیندے پاکستان دی سب توں وݙی مالیاتی سکیم دی منظوری ݙتی۔ ایں سکیم دا مقصد قومی بجٹ تے نواں مالی دباؤ پاتے بغیر اگلے چھی سالاں اچ 1,275 ارب روپے دے گردشی قرضے کوں ختم کرݨ اے۔ ایں سکیم دے تحت پاور ہولڈنگ کمپنی دی 683 ارب روپے دی ری فنانسنگ کیتی ویسی اَتے انڈیپینڈنٹ پاور پروڈیوسرز (آئی پی پیز) دے بقایا جات دی ادائیگی وی کیتی ویسی۔ اے فیصلہ حکومت پاکستان دے پائیدار ادارہ جاتی اصلاحات لاگو کرݨ، مالیاتی بوجھ گھٹ کرݨ اَتے توانائی دے شعبے اچ سرمایہ کاراں دے اعتماد کوں بحال کرݨ دا عزم ݙسیندے۔ وفاقی کابینہ وزارت انسانی حقوق دی سفارش تے کمال الدین ٹیپو کوں کمیشن برائے پروٹیکشن آف جرنلسٹس اینڈ میڈیا پروفیشنلز دا چیئرپرسن مقرر کرݨ دی منظوری ݙتی۔ کابینہ نیشنل پاور پارکس مینجمنٹ کمپنی لمیٹڈ کوں روش پاور پلانٹ گھنݨ سانڳے مختلف خدمتاں ڳھنݨ کیتے پاکستان پبلک پروکیورمنٹ ریگولیٹری اتھارٹی آرڈیننس 2002 دے سیکشن 21 دے تحت استثنیٰ دی وی منظوری ݙتی۔ وفاقی کابینہ، کابینہ کمیٹی برائے لیجسلیٹو کیسز دے 21 مئی 2025 کوں تھیوݨ آلے اجلاس دے فیصلیاں دی وی توثیق کیتی۔
