اسلام آباد۔18 جون(اے پی پی) صدر مملکت آصف علی زرداری پی او ایف واہ دا دورہ کیتے اتے آکھیے جو موجودہ اَتے آندے سکیورٹی چیلنجز سانڳے قومی دفاعی صلاحیتاں کوں ٻیا تکڑا کرݨ دی لوڑھ اے، ایں سانڳے پاکستان دے دفاع کوں مضبوط ٻݨاوݨ پہلی ترجیح اے۔ ایوان صدر دے پریس ونگ توں جاری بیان دے مطابق، صدر مملکت دے آوݨ تے چیئرمین پی او ایف واہ لیفٹیننٹ جنرل سید طاہر حمید شاہ انہاں دا استقبال کیتا۔ ایں موقع تے وفاقی وزیر دفاعی پیداوار محمد رضا حیات ہراج اَتے سیکرٹری وزارت دفاعی پیداوار لیفٹیننٹ جنرل (ر) محمد چراغ حیدر وی موجود ہن۔ چیئرمین پی او ایف صدر مملکت کوں پی او ایف واہ دے مختلف پیداواری یونٹس بارے بریفنگ ݙتی اتے ݙسایا گیا جو پی او ایف واہ ملک دیاں دفاعی ضرورتاں پورا کرݨ اچ کلیدی کردار ادا کریندا پئے۔ بریفنگ اچ پی او ایف دی فنی صلاحیتاں اَتے دفاعی پیداوار اچ ادارے دیاں کوششاں کوں اڳونہا کیتا گیا۔ صدر مملکت آصف علی زرداری فیکٹریز دے مختلف پیداواری یونٹس دا وی دورہ کیتا اَتے فیکٹریز دے عملے دی فنی مہارت، عزم اَتے پیشہ ورانہ صلاحیتاں دی تعریف کیتی۔ انہاں ملکی دفاع کوں مضبوط ٻݨآوݨ کیتے پی او ایف دے مؤثر کردار دی وی تعریف کیتی۔
