اسلام آباد۔ 18 جون (اے پی پی) وزیراعظم محمد شہباز شریف آکھیے جو بین الاقوامی معیار دی تربیت نال ساݙی افرادی قوت دی ٻاہرلے ملکاں اچ کھپت ودھسی اَتے زرِ مبادلہ اچ وادھا تھیسی، سارے تربیتی اداریں دی بین الاقوامی ایکریڈیٹیشن کروائی ونڄے۔ وزیراعظم آفس دے میڈیا ونگ توں جاری کیتے ڳئے بیان موجب وزیراعظم محمد شہباز شریف دی صدارت اچ نیشنل ووکیشنل اینڈ ٹیکنیکل ٹریننگ کمیشن (نیوٹیک) دے امور اَتے پیشہ ورانہ تربیت دے حوالے نال اجلاس تھیا۔ وزیراعظم آکھیا جو پاکستان اچ وفاقی اَتے صوبائی پیشہ ورانہ اداریں اچ ݙتی ونڄݨ آلی تربیت کوں بین الاقوامی معیار دا بݨایا ونڄے تاں جو نینگراں کوں ٻاہرلے ملک روزگار ڳولݨ اچ سوکھ تھیوے، بین الاقوامی معیار دی تربیت نال ساݙی افرادی قوت دی ٻاہرلے ملکاں اچ کھپت ودھسی اَتے زرِ مبادلہ اچ وادھا تھیسی۔ انہاں آکھیا جو سارے تربیتی اداریں دی بین الاقوامی ایکریڈیٹیشن کروائی ونڄے۔ ایں موقع تے وزیراعظم کوں پیشہ ورانہ تربیت دے حوالے نال کیتے ڳئے اقدامات تے بریفنگ ݙتی ڳئی۔ بریفنگ اچ ݙسایا ڳیا جو نیوٹیک ملک بھر اچ وفاقی اَتے صوبائی تربیتی اداریں دی میپنگ کر ڳھدی اے، نیوٹیک دے نیشنل ٹیکنیکل اینڈ ووکیشنل ٹریننگ ݙیٹا مینجمنٹ سسٹم فعال تھی چکیے، پبلک سیکٹر دے سارے پیشہ ورانہ تربیتی پروگرامز کوں نیو ٹیم دے سنگل ریگولیٹری فریم ورک دے تحت کیتا ویندا پئے اَتے نصاب دی اسٹینڈرڈائزیشن وی کیتی ویندی پئی اے، نیوٹیک دے زیرِ انتظام 2023-24 اچ ݙتی ڳئی ٹریننگ دے 53 فیصد بندیاں کوں نوکریاں مل چکین، اے ݙیٹا تربیت دے چھی مہینے بعد حاصل کیتا ڳیا ہا۔ 2020ء توں 2024ء تئیں نیوٹیک دے تحت پیشہ ورانہ تربیت حاصل کرݨ آلے 25 ہزار توں ودھ بندیاں کوں ٻاہرلے ملک نوکری ملی۔ ایں سال ہک لکھ 46 ہزار بندیاں کوں خدمات، سیاحت، آئی ٹی، بینکنگ، ٹیکسٹائل اَتے تعمیرات دے شعبیاں اچ پیشہ ورانہ تربیت ݙتی ڳئی، اڳلے سال دا ہدف 3 لکھ پنڄاہ ہزار اے۔ اجلاس اچ وفاقی وزیر تعلیم ڈاکٹر خالد مقبول صدیقی، وفاقی وزیر اقتصادی امور احد خان چیمہ، وفاقی وزیر انفارمیشن ٹیکنالوجی و ٹیلی کام شزا فاطمہ، چیئرمین پرائم منسٹر یوتھ پروگرام رانا مشہود احمد خان اَتے متعلقہ اعلیٰ سرکاری افسراں شرکت کیتی۔
