واشنگٹن ۔ 19 جون (اے پی پی) امریکی صدر ڈونلڈ ٹرمپ پاک فوج دے سربراہ فیلڈ مارشل عاصم منیر دے اعزاز اچ آپݨی سرکاری رہائش وائٹ ہاؤس اچ ݙوپہر دا کھاݨا ݙتا اَتے آکھیا جو پاک فوج دے سربراہ نال ملاقات انہاں کیتے اعزاز اے۔ ملاقات اچ ݙوہیں رہنماواں اسرائیل ایران بحران سودھے بہوں سارے معاملیاں تے ڳالھ مہاڑ کیتی۔ ملاقات دے بعد میڈیا نال ڳالھ مہاڑ اچ ہک سوال دے جواب اچ صدر ڈونلڈ ٹرمپ آکھیا جو پاکستان (دے فیلڈ مارشل عاصم منیر) ایران کوں چنڳی طرح بلکہ بہوں چنڳی طرح جاݨدن اَتے او اسرائیل ایران تنازعہ تے خوش کائنی۔ ایہو نئیں جو اسرائیل دے نال انہاں دے تعلقات چنڳے ہن، حقیقت اچ او ݙوہیں کوں جاݨدن بلکہ شاید او ایران کوں زیادہ چنڳا جاݨدن اَتے او صورتحال کوں ݙیکھدے پئن اَتے او (فیلڈ مارشل عاصم منیر) میݙے نال متفق ہن۔ میݙا انہاں کوں اتھاں سݙݨ دی وجہ اے ہئی جو میں ایں ڳالھ تے انہاں دا شکریہ ادا کرݨ چاہندا جو انہاں (بھارت دے نال) جنگ توں گریز کیتا اَتے جنگ ختم تھی ڳئی۔ امریکی صدر بھارتی وزیراعظم نریندر مودی کوں وی ایں دا کریڈٹ ݙتا۔ انہاں آکھیا جو ایہو وجہ اے جو فیلڈ مارشل عاصم منیر نال ملاقات انہاں کیتے باعثِ اعزاز اے۔ واضح رہوے جو فیلڈ مارشل عاصم منیر پاک فوج دے پہلے سربراہ ہن جنہاں کوں امریکی صدر ولوں وائٹ ہاؤس اچ ݙوپہر دا کھاݨا ݙتا ڳئے جو امریکا دے پاکستان دے نال آپݨے تعلقات کوں ودھاوݨ اچ دلچسپی کوں اجاگر کریندے۔
