اسلام آباد۔ 19 جون (اے پی پی) وفاقی وزیر صحت مصطفیٰ کمال آکھیا ہئی جو ودھدی ہوئی آبادی ملکی معیشت تے دباؤ پیندی اے، ایں مسئلے نال جنگی بنیاداں تے نبڑݨ کیتے ملک دے سارے طبقیاں کوں آپݨا کردار ادا کرݨا پوسی، چاریں صوبے ایں بارے آپݨا کردار ادا کرن۔ خمیس کوں قومی اسمبلی اچ بجٹ تے بحث اچ حصہ گھندیں ہوئیں انہاں آکھیا جو بجٹ بݨیندے ویلھے بنیادی طور تے آبادی دا تخمینہ لاوݨا پوندے، ملک اچ ودھدی ہوئی آبادی دی شرح اساݙے سارے بجٹ تخمینیاں کوں تباہ تے برباد کر ݙیندی اے۔ انہاں آکھیا جو ہیپاٹائٹس سی اچ اساں دنیا اچ پہلے نمبر تے ہیسے، شوگر اَتے ٻئی بیماریاں وی پاکستان اچ عام ہن، اساݙے ہسپتالاں اچ اتنا رش ہوندے جو جلسے دی صورتحال لڳدی اے۔ ماہرین آکھدن جو 68 فیصد بیماریاں آلودہ پاݨی دی وجہ توں ہن، اساں کوں قومی سطح تے پیوݨ دے صاف پاݨی دا انتظام کرݨا چاہیدے، پیوݨ دے صاف پاݨی اچ سیوریج دا پاݨی شامل ہوندے جو لوک استعمال کریندن اَتے بیمار تھی ویندن۔ انہاں آکھیا جو نکے بالاں اَتے نینگراں کوں کینسر سواں موذی مرض تھی ویندے ایں دی بنیادی وجہ آبادی اچ وادھا، وسائل دی ڳھٹکی اَتے آلودگی اے۔ انہاں آکھیا جو صوبیاں اچ آبادی دی صورتحال کوں قابو اچ گھن آوݨ کیتے صوبائی حکومتاں کوں آپݨا کردار ادا کرݨا چاہیدے، ہک ݙو کروڑ 60 لکھ بال سکولاں توں ٻاہر ہن۔ لکھاں بال غذائی قلت دا شکار ہن ملک اچ 10 توں 11 ہزار ماواں ڈیلیوری دے ویلھے فوت تھی ویندن۔ انہاں آکھیا جو اگر 2030 تئیں اساں آبادی تے قابو نہ پاتا تاں اساں دنیا دے زیادہ آبادی آلے وݙے ملکاں اچ شامل تھی ویسوں، وفاقی حکومت ملک دے چاریں صوبیاں، علماء کرام سودھے ہر طبقے کوں اِن بورڈ گھنے اَتے آبادی دی شرح کوں قابو کرݨ کیتے اقدامات کرے۔ انہاں آکھیا جو ہر صورت اچ 3.5 فیصد توں گھٹ کر تے بالاں دی پیدائش کوں 2 فیصد تئیں گھن آوݨا ہوسی۔ انہاں آکھیا جو آبادی تے قابو پاوݨ کوئی سیاسی، لسانی یا دینی مسئلہ نئیں۔
