برآمدات تے مبنی معاشی ترقی کیتے ملکی صنعتاں دی ترقی ضروری اے، وزیراعظم شہباز شریف

اسلام آباد۔ 19 جون (اے پی پی) وزیراعظم محمد شہباز شریف آکھیا جو برآمدات تے مبنی معاشی ترقی کیتے ملکی صنعتاں دی ترقی ضروری اے، ٹیرف ریشنلائزیشن پالیسی دے ذریعے ملک اچ سرمایہ کاری ودھسی، اے ڳالھیں انہاں خمیس کوں اتھاں ملکی صنعتاں بارے اجلاس دی صدارت کریندیں ہوئیں آکھی۔ اجلاس اچ وفاقی وزیر اقتصادی امور احد خان چیمہ، معاون خصوصی ہارون اختر اَتے متعلقہ اداریاں دے اعلیٰ افسراں شرکت کیتی۔ وزیراعظم آکھیا جو ملکی برآمدات اچ صنعت مرکزی حیثیت رکھیندی اے۔ برآمدات تے مبنی معاشی ترقی کیتے ملکی صنعتاں دی ترقی ضروری اے۔ ملکی صنعتاں کوں عالمی معیار دے مطابق افرادی قوت اَتے جدید ٹیکنالوجی نال لیس کرݨ اساݙی پہلی ترجیح اے۔ وزیراعظم آکھیا جو ٹیرف ریشنلائزیشن پالیسی دے ذریعے ملک اچ سرمایہ کاری ودھسی۔ غیر یقینی صنعتی پالیسیاں صنعتاں دے ودھارے اچ رکاوٹ رہی اے۔ اساں ہک موثر پالیسی پاروں صنعتی ترقی کوں نویں بلندیاں تے گھن ویسوں۔ اڄوکی معاشی پالیسیاں ملکی صنعتاں دی ترقی کوں ݙیکھدیں ہوئیں بݨایاں ڳئن۔ وزیراعظم آکھیا جو صنعتی پیداوار اچ وادھے اَتے صنعتاں کوں درپیش مسئلیاں دے پائیدار حل کیتے صنعتی پالیسی کوں جلدی توں جلدی مکمل کیتا ونجے، اجلاس اچ وزیراعظم کوں ملکی صنعتاں دی ترقی بارے سفارشات پیش کیتی ڳئن۔ وزیراعظم کوں ݙسایا ڳیا جو موثر صنعتی پالیسی دے ذریعے ملک دے مینوفیکچرنگ سیکٹر کوں بحال کیتا ویسی۔ وزیراعظم سارے متعلقہ سٹیک ہولڈرز دی مشاورت نال صنعتی پالیسی کوں حتمی شکل ݙیوݨ دی ہدایت کیتی۔