اسلام آباد۔ 19 جون (اے پی پی) وزیراعظم محمد شہباز شریف آکھیا جو پاکستان دی معیشت دا استحکام اَتے ترقی دے پندھ معاشی ٹیم دی محنت دا نتیجہ اے۔ پاکستان اچ ورلڈ بینک ولوں کنٹری پارٹنر شپ فریم ورک کیتے پاکستانی حکام دے نال تعاون و محنت تے سبکدوش تھیوݨ آلے کنٹری ڈائریکٹر ناجی بن حسائن دے کردار کوں ہمیشہ چنڳے لفظاں اچ یاد کیتا ویسی۔ وزیراعظم آفس دے میڈیا ونگ توں جاری بیان موجب اے ڳالھیں انہاں پاکستان اچ عالمی بینک دے سبکدوش تھیوݨ آلے کنٹری ڈائریکٹر ناجی بن حسائن نال ڳالھ مہاڑ کریندیں ہوئیں آکھی جنہاں خمیس کوں اتھاں انہاں نال الوداعی ملاقات کیتی۔وزیراعظم آکھیا جو پاکستان اَتے ورلڈ بینک وچال شراکت داری دی مضبوطی کیتے تساں آپݨا بھرپور کردار ادا کیتا جئیں تے اساں تہاݙے شکر گزار ہیسے، 2022ء دے چھل اچ تساں متاثرہ پاکستانیاں دی مدد تے بحالی کیتے ݙینھ رات کم کیتا۔ انہاں آکھیا جو پاکستان دی معیشت دا استحکام اَتے ترقی دا پندھ معاشی ٹیم دی محنت دا نتیجہ اے۔ وزیراعظم آکھیا جو تساں دنیا دے کہیں وی کُنڈ اچ آپݨیاں خدمتاں سرانجام ݙیوو، پاکستان اَتے ایندے عوام تہاݙیاں پاکستان کیتے خدمتاں کوں ہمیشہ مثبت انداز نال یاد رکھیسن۔ وزیراعظم ناجی بن حسائن کیتے نیک خواہشات دا اظہار اَتے انہاں دی صحت و ترقی دی دعا کیتی۔ناجی بن حسائن آکھیا جو وزیراعظم شہباز شریف دی قیادت اچ پاکستان دی معیشت اچ انقلابی تبدیلی، استحکام اَتے ترقی دے پندھ دی شروعات قابل تحسین ہن۔ وزیراعظم شہباز شریف دی قیادت اچ پاکستان دی معاشی ٹیم پاکستان کوں ڈیفالٹ دے خطرے توں بچا تے استحکام دے راہ تے ٹوریا۔ وزیراعظم شہباز شریف خود ہک محنتی لیڈر ہن جنہاں مشکلاں دے باوجود پاکستان دی معیشت کوں بچایا۔ پاکستان دی اڄوکی معاشی ٹیم پاکستان دی معیشت کوں کمال مہارت نال استحکام دے بعد ترقی دی راہ تے ٹوریے۔ ملاقات اچ ورلڈ بینک دے پاکستان اچ منیجر آپریشنز گیلئیس ݙراگیلس دے علاوہ نائب وزیراعظم تے وزیر خارجہ محمد اسحاق ڈار، وفاقی وزرا احد خان چیمہ، محمد اورنگزیب اَتے متعلقہ اعلیٰ حکام وی موجود ہن۔
