اسلام آباد۔ 19 جون (اے پی پی) پاکستان اَتے ازبکستان بحری تعاون کوں ودھاوݨ اَتے بلیو اکانومی، گرین شپنگ اَتے وسطی ایشیا کوں بحیرہ عرب نال جوڑݨ آلے تجارتی ڈھانچے دی تشکیل کیتے ہک مشترکہ ورکنگ گروپ دے قیام تے اتفاق کیتا اے۔ اے پیش رفت وفاقی وزیر بحری امور محمد جنید انوار چوہدری اَتے پاکستان اچ ازبکستان دے سفیر وچال ہک اعلیٰ سطحی ملاقات اچ سامݨے آئی جیں اچ ݙوہیں فریقین سمندری رابطیں کوں مستحکم کر تے مشترکہ اقتصادی ترقی، علاقائی ربط اَتے سمندر تے مبنی صنعتاں دے ذریعے دیرتئیں خوشحالی کوں ودھاوݨ دی لوڑھ تے زور ݙتا۔وفاقی وزیر جنید انوار چوہدری ازبکستان کوں گوادر اَتے کراچی جیھے بندرگاہی شہراں توں عالمی منڈیاں تئیں گھٹ لاڳت، موثر رسائی ݙیوݨ دی اہمیت تے روشنی پاتی۔ انہاں ازبکستان کوں سڑکاں دے نیٹ ورک کوں بہتر بݨاوݨ اَتے گوادر پورٹ نال منسلک تھیوݨ دی دعوت ݙیندے آکھیے جو اے تجارتی اعتبار نال موثر اَتے عالمی پائیداری دے اہداف نال ہم آہنگ اے۔ملاقات اچ بلیو اکانومی دے اہم شعبیں جیڑھے جو فشریز، آبی زراعت، سمندری خوراک دی تیاری اَتے ساحلی سیاحت اچ مشترکہ منصوبیں دے امکانات تے وی غور کیتا ڳئے جنہاں نال خلیج، افریقہ اَتے جنوب مشرقی ایشیا دیاں منڈیاں اچ بہتر منافع کمایا ونج سڳدے۔ وفاقی وزیر بحری امور تجویز پیش کیتی جو ازبکستان اَتے قازقستان دیاں خشک بندرگاہواں کوں پاکستان دیاں سمندری بندرگاہواں نال سڑک و ریل نیٹ ورک دے ذریعے جوڑ تے ہک تجارتی راہداری قائم کیتی ونڄے۔ اے منصوبہ 20 ارب ڈالر توں ودھ دی تجارت دے دروازے کھول سڳدے اَتے وسطی ایشیائی ملکاں کوں بحری معیشت اچ موثر شرکت دا موقع ݙیسی۔ازبک سفیر خصوصی طور تے فشریز اَتے سمندری خوراک دے شعبے اچ مشترکہ منصوبیں اچ دلچسپی ݙکھائی ۔ انہاں ازبک تجارت کیتے پاکستان اچ آف ڈاک ٹرمینل مختص کرݨ دی تجویز وی پیش کیتی۔ سفیر وزیر کوں ݙسایا جو ازبک تاجر برادری دا ہک اعلیٰ سطحی وفد وختی کراچی دا دورہ کریسی، جتھاں او بندرگاہی انفراسٹرکچر اَتے بالخصوص میرین فشریز ڈیپارٹمنٹ دیاں سرگرمیاں دا جائزہ گھنسی تاں جو ݙو طرفہ تجارتی تعاون کوں مزید وسعت ݙتی ونڄ سڳے۔
