اسلام آباد۔ 19 جون (اے پی پی) وفاقی وزیر پارلیمانی امور ڈاکٹر طارق فضل چوہدری آکھیے ہئی جو حکومت بجٹ تے بحث دے دوران ارکان دیاں تجویزاں کوں سنجیدگی نال نوٹ کریندی پئی اے۔ قومی اسمبلی اچ اپوزیشن دے علامتی واک آؤٹ دے موقع تے اظہار خیال کریندے ڈاکٹر طارق فضل چوہدری آکھیے جو جئیں ݙینھ توں بجٹ پیش تھئے، حکومت مسلسل ارکان دیاں تجویزاں کوں نوٹ کریندی پئی اے۔ انہاں آکھیے جو بزنس ایڈوائزری دے فیصلیں موجب پی ٹی آئی ارکان دا ویلھا پورا تھی چکئے، اے حکومت دی سنجیدگی اے جو او اپوزیشن دے ارکان کوں اضافی ویلھا ݙیندی پئی اے۔انہاں آکھیا جو ݙو توں ترائے وزراء ایوان اچ موجود ہوندن، وزارت خزانہ دے حکام اَتے پارلیمانی سیکرٹری سعد وسیم وی ایوان اچ تجویزاں نوٹ کریندے پئن۔ انہاں آکھیے جو عمران خان دے دور اچ جݙاں بجٹ پیش تھیندے رہین تاں او ریکارڈ پیش کیتا ونڄے جو انہاں کِنے وزراء ایوان اچ ہوندے ہن، ایں ویلھے ایوان اچ 5 وزراء موجود ہن۔ انہاں آکھیے جو کَل ڈپٹی وزیراعظم وی ایوان اچ وضاحت کیتی اے جو تنخواہواں اچ 10 فیصد وادھا ہوسی اَتے سولر پینلز تے ٹیکس دی شرح کوں گھٹ کیتا ڳئے۔
