سینٹ پیٹرزبرگ۔ 19 جون (اے پی پی) وفاقی وزیر توانائی علی پرویز ملک روس دے شہر سینٹ پیٹرزبرگ اچ جاری بین الاقوامی اقتصادی فورم 2025 دے موقع تے روسی وزیر توانائی اَتے پاک-روس بین الحکومتی کمیشن دے چیئرمین سرگئی تسویلیف نال ملاقات کیتی۔ ملاقات اچ توانائی، تجارت، سرمایہ کاری، کان کنی اَتے عوامی رابطیں سودھے ٻہوں سارے شعبیں اچ تعاون ودھاوݨ تے تفصیلی ڳالھ مہاڑ کیتی ڳئی۔ترجمان پٹرولیم ڈویژن موجب ملاقات اچ روس دے وزیر توانائی انہاں سارے شعبیں اچ تعاون ودھاوݨ اچ دلچسپی ݙکھائی اَتے امید ظاہر کیتی جو اسلام آباد اچ اڄوکے سال ݙوجھی سہ ماہی اچ بین الحکومتی کمیشن دے ݙاہویں اجلاس دے موقع تے باقاعدہ معاہدیں اَتے عملی پیش رفت تے ڳالھ کیتی ڳئی۔ وفاقی وزیر توانائی علی پرویز ملک روسی ادارے روسٹوم منرلز دے فرسٹ ڈپٹی ڈائریکٹر الیکسی شی میتوف نال وی ملاقات کیتی۔ ایں موقع تے انہاں روسی ادارے کوں پاکستان دے کان کنی دے شعبے اچ سرمایہ کاری دی دعوت ݙتی، بالخصوص جدید ٹیکنالوجی، تحفظ دے اقداماں اَتے شعبے دی استعداد کار ودھاوݨ کیتے اشتراک دی تجویز پیش کیتی۔ ڈپٹی ڈائریکٹر الیکسی شی میتوف پاکستان اچ کان کنی دے شعبے اچ سرمایہ کاری دے امکانات دا جائزہ ڳھنݨ اَتے تجویزاں پیش کرݨ تے آمادگی ظاہر کیتی۔اے دورہ پاکستان اَتے روس وچال اقتصادی اَتے توانائی دے شعبے اچ ودھدے ہوئے تعاون دی ہک مثبت قدم سمجھیا ویندا پئے، جیڑھا مستقبل نیڑے اچ عملی معاہدیں دی صورت اچ مزید مضبوطی اختیار کر سڳدے جے۔ اے فورم 18 توں 21 جون تئیں جاری رہسی جئیں اچ دنیا توں اعلیٰ سطحی حکومتی و تجارتی وفد شریک ہن۔
