اسلام آباد۔ 19 جون (اے پی پی) سپیکر قومی اسمبلی سردار ایاز صادق نال برطانوی ہائی کمشنر جین میریٹ پارلیمنٹ ہاؤس اچ ملاقات کیتی جئیں اچ ݙو طرفہ تعلقات سودھے سانجھی دلچسپی دے ݙوجھے امور تے ڳالھ مہاڑ کیتی ڳئی۔ سپیکر برطانوی ہائی کمشنر نال ڳالھ مہاڑ کریندے آکھیے جو پاکستان-برطانیہ تاریخی تعلقات مزید تکڑے بݨاوݨ کیتے پارلیمانی تعاون ناگزیر اے، پاکستان برطانیہ دے نال دوستانہ تعلقات کوں مزید مستحکم کرݨ چاہندے ۔ سپیکر پارلیمانی رابطے کوں سانجھی ہم آہنگی کیتے کلیدی قرار ݙتا اَتے آکھیے جو پاکستان دی پارلیمنٹ کوں دنیا دی پہلی “گرین پارلیمنٹ” تھیوݨ دا اعزاز حاصل اے، پارلیمنٹ آف پاکستان دی عمارت کوں 2015ء اچ شمسی توانائی تے منتقل کیتا ڳیا، پارلیمانی انٹرنشپ پروگرام اچ انرولمنٹ کیتے 60 ہزار توں ودھ نینگراں دلچسپی ظاہر کیتی۔انہاں آکھیا جو اڄوکے سال جون اچ شروع تھیوݨ آلے ‘سمر انٹرنشپ پروگرام’ اچ 200 طالب علماں کوں انٹرنشپ دا موقع ݙتا ڳئے، نینگراں کوں جمہوری عمل توں واقف کراوݨ کیتے پارلیمانی تربیت ناگزیر اے۔ شفافیت کوں ودھاوݨ کیتے قومی اسمبلی دے 1400 توں ودھ ملازماں دے انٹرویوز خود کیتے، ملازماں دی اے آئی اَتے آئی سی ٹی اچ تربیت نال گورننس اچ بہتری آسی۔ قانون سازی دے معیار اچ بہتری کیتے لیجسلیٹو کونسل اَتے تکنیکی سٹاف کوں میرٹ تے ایف پی ایس سی دے ذریعے بھرتی کیتا ڳئے۔ پرائیویٹ ممبرز ٻلز کوں کمیٹیاں دے ذریعے جائزہ ڳھن تے ایوان اچ پیش کیتا ویندے۔برطانوی ہائی کمشنر جین میریٹ پاکستان-برطانیہ تعلقات کوں مزید ودھاوݨ دے عزم دا اعادہ کیتا اَتے آکھیا جو برطانیہ پارلیمانی تعاون دے ذریعے ݙو طرفہ تعلقات کوں ودھارا ݙیوݨ چاہندے۔ برطانوی ہائی کمشنر پارلیمانی اصلاحات اَتے نینگراں دی شمولیت دے اقداماں دی تعریف کیتی تے پاکستان دی گرین انرجی اصلاحات تے خراج تحسین پیش کیتا۔ انہاں آکھیا جو قانون سازی دے معیار اچ بہتری گھن آوݨ کیتے ݙوہیں ملکاں دیاں پارلیماناں دے تجربے دا تبادلہ اہم اے، برطانیہ تعلیم، موسمیاتی تبدیلی اَتے سماجی ترقی دے شعبیں اچ پاکستان نال تعاون جاری رکھیسی۔
