اسلام آباد۔ 19 جون (اے پی پی) پاکستان ایران تے اسرائیلی جارحیت دی شدید لفظاں اچ مذمت کریندے آکھیے جو ایران کوں اقوام متحدہ دے آرٹیکل 51 دے تحت اپݨے دفاع دا حق حاصل اے۔ ترجمان دفتر خارجہ شفقت علی خان پریس بریفنگ اچ ھک سوال دے جواب اچ آکھیے جو ایران تے اسرائیلی حملے دے خطے دے امن تے سنگین اثرات پوسن۔ایران اچ موجود پاکستانی شہریاں دے انخلاء دے حوالے نال ہک سوال دے جواب اچ ترجمان آکھیے جو ایران توں ہݨ تئیں ترائے ہزار توں ودھ پاکستانیاں کوں کڈھیا ڳئے انہاں آکھیا جو پاکستانی شہریاں جنہاں اچ طالب علم وی شامل ہن کوں تفتان دی سرحدی کراسنگ دے علاوہ اشک آباد، باکو اَتے بغداد دے رستے وطن واپس پڄایا ڳئے۔ ترجمان ایں حوالے نال تہران اچ پاکستانی سفارتخانے دے علاوہ زاہدان اَتے مشہد اچ پاکستانی قونصل خانیں دے نال نال ایرانی حکومت دے تعاون دی تعریف کیتی ۔ انہاں آکھیے جو ایران پاکستان دا بھرا، دوست اَتے پڑوسی ملک اے اَتے ݙوہیں ملک گھاٹےمذہبی، ثقافتی اَتے تاریخی رشتیں اچ ڳھنڈیے ہوئن۔
