وزیراعظم دی جعلی ادویات دا گھناؤنا کاروبار روکݨ کیتے جدید ٹیکنالوجی دے استعمال دی ہدایت، عوام کیتے صحت دیاں بہترین سہولتاں ݙیوݨ ترجیح اے، شہباز شریف

اسلام آباد۔ 19 جون(اے پی پی)وزیراعظم محمد شہباز شریف ملک اچ جعلی ادویات دا گھناؤنا کاروبار روکݨ کیتے جدید ٹیکنالوجی دے استعمال دی ہدایت کریندے آکھیا جو اعلیٰ معیار دی طبی تعلیم تے کہیں وی قسم دا سمجھوتہ بالکل قبول نئیں، پاکستان بھر اچ عوام کیتے صحت دیاں بہترین سہولتاں ݙیوݨ حکومت دی اولین ترجیح اے۔ وزیراعظم آفس دے میڈیا ونگ توں جاری پریس ریلیز دے مطابق خمیس کوں وزیراعظم محمد شہباز شریف دی زیر صدارت وزارت قومی صحت دے امور دے حوالے نال اجلاس تھیا۔ وزیراعظم شعبہ صحت اچ پائیدار اصلاحات کیتے اقدامات تے وفاقی وزیر صحت سید مصطفیٰ کمال دی متحرک قیادت اچ وزارت صحت دی کارکردگی کوں سراہیا اَتے آکھیا جو پاکستان بھر اچ عوام کیتے صحت دیاں بہترین سہولتاں ݙیوݨ حکومت دی اولین ترجیح اے۔ اسلام آباد اچ صحت دیاں سہولتاں ݙیوݨ کیتے رفاحی اداریاں اَتے نجی شعبے دے نال اشتراک دا لائحہ عمل پیش کیتا ونڄے۔ وزیراعظم پاکستانی فارما کمپنیاں دی عالمی ادارہ صحت توں ایکریڈیٹیشن کراوݨ دی حوصلہ افزائی دی ہدایت کریندے آکھیا جو عالمی ادارہ صحت دی ایکریڈیٹیشن کراوݨ نال پاکستانی ادویات دا معیار بہتر تھی سڳسی اَتے انہاں ادویات کوں برآمد کرݨ دے موقع ودھسن۔ وزیراعظم ملک اچ جعلی ادویات دے گھناؤنے کاروبار دے مکمل سدباب کیتے جدید ٹیکنالوجی دے استعمال دی ہدایت کریندے ہوئیں آکھیا جو اعلیٰ معیار دی طبی تعلیم تے کہیں وی قسم دا سمجھوتہ قطعاً قبول نئیں۔ وزیراعظم پاکستانی میڈیکل کالجز اچ معیاری تعلیم دی فراہمی یقینی بݨاوݨ کیتے کالجز دی تھرڈ پارٹی ویلیڈیشن دی ہدایت کریندے ہوئیں آکھیا جو پاکستان اچ نرسنگ دے شعبے دا جامع جائزہ ڳھدا ونجے، شعبہ صحت اچ اصلاحات دے نفاذ دے عمل اچ کہیں وی قسم دی سیاسی مداخلت برداشت نا کیتی ویسی۔ اجلاس اچ وزیراعظم کوں شعبہ صحت دی ترقی اچ حائل رکاوٹاں توں آگاہ کیتا ڳیا اَتے انہاں دے پائیدار حل دے حوالے نال سفارشات پیش کیتیاں ڳیاں۔ بریفنگ اچ ݙسایا ڳیا جو ادویات اَتے طبی آلات دی رجسٹریشن دے پورے مرحلے کوں آندے مہینے دے اختتام تئیں مکمل طور تے ڈیجیٹائز کر ݙتا ویسی۔ بریفنگ اچ ݙسایا ڳیا جو طبی آلات اَتے ادویات دی رجسٹریشن دے دورانیے کوں ہک سال توں گھٹ کر تے ترائے مہینے تئیں گھن آیا ویندا پئے، اسلام آباد اچ نویں قائم شدہ بیسک ہیلتھ یونٹس، ریجنل بلڈ سینٹر اَتے آئیسولیشن ہسپتال اینڈ انفیکشن ٹریٹمنٹ سینٹر (آئی ایچ آئی ٹی سی) کوں مخیر حضرات دے تعاون نال استعمال اچ گھن آوݨ کیتے منصوبہ بندی تے کم جاری اے۔ اجلاس اچ وفاقی وزیر منصوبہ بندی و ترقی ڈاکٹر احسن اقبال، وفاقی وزیر قومی صحت سید مصطفیٰ کمال، وفاقی وزیر اقتصادی امور احد خان چیمہ، وزیر مملکت برائے صحت ڈاکٹر مختار احمد بھرتھ اَتے متعلقہ اداریاں دے اعلیٰ افسراں شریک ہن۔