اسلام آباد۔ 19 جون(اے پی پی)پاکستان ایران دے خلاف اسرائیل دی بلاجواز اَتے ناجائز جارحیت دی شدید مذمت کریندے ہوئیں آکھیے جو اسرائیلی فوجی حملے ایران دی خودمختاری اَتے علاقائی سالمیت دی خلاف ورزی اَتے اقوام متحدہ دے چارٹر اَتے بین الاقوامی قوانین دے بنیادی اصولاں دی صریحاً خلاف ورزی ہن۔ اقوام متحدہ دے چارٹر دے آرٹیکل 51 دے تحت ایران کوں اپݨے دفاع دا حق حاصل اے۔ ترجمان دفتر خارجہ شفقت علی خان خمیس کوں اتھاں پریس بریفنگ اچ آکھیا جو پاکستان ایرانی عوام دے نال پرعزم یکجہتی دے نال کھڑے اَتے واضح طور تے اشتعال انگیزی دی مذمت کریندے جو پورے خطے اَتے ایں توں ٻاہر دے امن و سلامتی اَتے استحکام کیتے ہک سنگین خطرہ اے اَتے جیںدے سنگین مضمرات ہن۔ انہاں آکھیا جو بین الاقوامی برادری اَتے اقوام متحدہ دی ذمہ داری اے جو او بین الاقوامی قانون دی پاسداری کرن، ایں جارحیت کوں فوری طور تے روکن اَتے جارح کوں ایندے اعمال دا جوابدہ ٹھہراوݨ۔ ترجمان آکھیا جو تیزی نال بدلدی ہوئی علاقائی پیش رفت اَتے مشرق وسطیٰ اچ کشیدگی اچ غیر معمولی وادھے خاص طور تے ایران دے خلاف اسرائیل دی جاری فوجی جارحیت سانڳے الجزائر، بحرین، برونائی دارالسلام، چاڈ، کوموروس، جبوتی، مصر، عراق، اردن، کویت، لیبیا، موریطانیہ، پاکستان، قطر، سعودی عرب، صومالیہ، سوڈان، ترکیہ، اومان اَتے متحدہ عرب امارات دے وزرائے خارجہ ہک مشترکہ بیان اچ اسلامی جمہوریہ ایران تے اسرائیل دے حملیاں اَتے کہیں وی ایجھے اقدام کوں جو بین الاقوامی قانون اَتے اقوام متحدہ دے چارٹر دے مقاصد اَتے اصولاں دی خلاف ورزی کریندن، دی ݙو ٹوک لفظاں اچ مذمت کیتی اے۔ وزرائے خارجہ ریاستاں دی خود مختاری اَتے علاقائی سالمیت دے احترام دے نال نال چنڳی ہمسائیگی دے اصولاں تے عمل کرݨ اَتے تنازعیاں دے پرامن تصفیہ دی ضرورت تے زور ݙتا۔ انہاں آکھیا جو ایران دے خلاف اسرائیل مخاصمت کوں روکݨ دی وݙی لوڑھ اے جو مشرق وسطیٰ اچ ودھدی ہوئی کشیدگی دے دوران سامݨے آئی اے۔ ایں خطرناک کشیدگی تے چنتا کریندے انہاں آکھیا جو ایںدے نال پورے خطے دے امن و استحکام تے سنگین نتائج پووݨ دا خدشہ اے۔ انہاں آکھیا جو ہک جامع جنگ بندی اَتے امن دی بحالی کیتے کم کرݨ دی لوڑھ اے۔ وزراء خارجہ آکھیا جو جوہری ہتھیاراں اَتے وݙے پیمانے تے تباہی دے ݙوجھے ہتھیاراں توں پاک مشرق وسطیٰ دے علاقے دے قیام دی فوری ضرورت اے، جو متعلقہ بین الاقوامی قرارداداں دے مطابق خطے دیاں ساریاں ریاستاں تے بغیر کہیں استثناء دے لاگو ہووے، نالے مشرق وسطیٰ دے سارے ملکاں کوں جوہری ہتھیاراں دے عدم پھیلاؤ (این پی ٹی) دے معاہدے اچ شامل تھیوݨ دی لوڑھ اے۔ ترجمان آکھیا جو بین الاقوامی ایٹمی توانائی ایجنسی (آئی اے ای اے) دیاں متعلقہ قرارداداں اَتے اقوام متحدہ دی سلامتی کونسل دے فیصلیاں دے مطابق جوہری تنصیبات کوں نشانہ بݨاوݨ توں گریز کرݨ دی انتہائی اہمیت اے کیوں جو اینجھیاں کارروائیاں بین الاقوامی قانون اَتے بین الاقوامی انسانی قانون بشمول 1949 دے جنیوا کنونشنز دی خلاف ورزی ہن۔ انہاں مشترکہ بیان اچ آکھیا جو ایرانی جوہری پروگرام دے حوالے نال پائیدار معاہدے تئیں پڄݨ دا واحد قابل عمل ذریعہ دے طور تے مذاکرات دے رستے تے تیکھی نال واپسی دی فوری ضرورت اے۔ انہاں آکھیا جو بین الاقوامی قانون دے متعلقہ قواعد دے مطابق بین الاقوامی آبی گزرگاہواں اچ نیویگیشن دی آزادی دے تحفظ دی اہمیت اَتے میری ٹائم سکیورٹی کوں نقصان پڄاوݨ توں گریز کرݨ ضروری اے۔ مشترکہ بیان دے مطابق سفارت کاری، ڳالھ مہاڑ اَتے چنڳی ہمسائیگی دے اصولاں دی پاسداری، بین الاقوامی قانون اَتے اقوام متحدہ دے چارٹر دے مطابق خطے اچ بحراناں دے حل دا ہکو قابل عمل رستہ اے اَتے اے جو فوجی ذرائع جاری بحران دا دیرپا حل نئیں گھن آ سڳدے۔ ترجمان آکھیا جو نائب وزیراعظم سینیٹر محمد اسحاق ڈار ایران دے وزیر خارجہ سید عباس عراقچی نال ٹیلی فونک ڳالھ مہاڑ کیتی۔ انہاں ترکیہ دے وزیر خارجہ ہاکان فیدان، مصر دے وزیر خارجہ بدر عبدالعاطی، متحدہ عرب امارات دے نائب وزیراعظم اَتے وزیر خارجہ شیخ عبداللہ بن زید النہیان اَتے برطانیہ دے وزیر خارجہ ݙیوڈ لیمی نال وی ٹیلی فون تے ڳالھ مہاڑ کیتی۔ ترجمان آکھیا جو انہاں رہنماواں وڳڑدی ہوئی علاقائی صورتحال تے چنتا کیتے۔ انہاں خطے اَتے ایں توں ٻاہر امن و استحکام کوں برقرار رکھݨ کیتے رل مل تے کم کرݨ دے عزم دا اعادہ کیتا۔ نائب وزیراعظم اَتے وزیر خارجہ ایران تے اسرائیل دے بلاجواز حملیاں توں خطے اَتے ایں توں ٻاہر امن و استحکام کوں لاحق سنگین خطرات کوں اجاگر کیتا۔ انہاں رہنماواں کشیدگی کوں گھٹ کرݨ اَتے مزید ودھݨ توں روکن دی ضرورت تے زور ݙتا۔ ترجمان دفتر خارجہ آکھیا جو نائب وزیراعظم محمد اسحاق ڈار پاکستان دی طرفوں فلسطینی عوام کوں فراہم کیتی ویندیاں جاری امداد دی صورتحال دا جائزہ ڳھنݨ کیتے ہک اعلیٰ سطحی اجلاس دی صدارت کیتی۔ انہاں اسرائیل دی طرفوں انسانی حقوق دی صریح خلاف ورزیاں دے نتیجے اچ غزہ اَتے مغربی کنارے اچ بگڑدی ہوئی انسانی صورتحال تے گہری تشویش دا اظہار کیتا۔ نائب وزیراعظم فلسطینی کاز کیتے پاکستان دی غیر متزلزل اخلاقی، سیاسی اَتے سفارتی حمایت دا اعادہ کریندے ہوئیں فلسطینی عوام کیتے انسانی امداد دی فراہمی کوں ودھاوݨ دے نال نال فلسطینی طلباء کوں تعلیمی مدد فراہم کرݨ دی ضرورت تے زور ݙیتا۔ ترجمان بھارتی حکام بھارت دے غیر قانونی طور تے زیر تسلط جموں و کشمیر اچ انسانی حقوق دی خلاف ورزیاں اَتے عائد پابندیاں دی مذمت کریندے ہوئیں آکھیا جو عید الاضحیٰ دے موقع تے کشمیری کوں سرینگر دی تاریخی جامع مسجد اَتے عیدگاہ اچ نماز عید کیتے جمع تھیوݨ دی اجازت نئیں ݙتی ڳئی۔ انہاں آکھیا جو ممتاز کشمیری رہنما میر واعظ عمر فاروق کوں وی گھر اچ نظر بند کر ݙتا ڳیا، اے مسلسل ستواں سال ہا جݙاں انہاں مقاماں تے عید دی نماز دی اجازت نئیں ݙتی ڳئی۔ ترجمان آکھیا جو واضح طور تے اے جابرانہ اقدام بھارتی حکام دی ہٹ دھرمی دی ہک ٻئی مثال اے اَتے کشمیری عوام دے بنیادی حقوق دی خلاف ورزی اے۔ انہاں بھارتی حکام تے زور ݙیتا جو او کشمیری عوام دے بنیادی حقوق دا احترام کرن اَتے انہاں کوں انہاں دا ناقابل تنسیخ حق خود ارادیت ݙیون جیںدا وعدہ اقوام متحدہ دی سلامتی کونسل دیاں متعلقہ قرارداداں اچ کیتا ڳئے۔
