اسلام آباد۔ 20 جون (اے پی پی) وزارت اطلاعات تے نشریات دے سوشل میڈیا پلیٹ فارم “فیکٹ چیکر” بھارتی میڈیا اتے سوشل میڈیا اکاؤںٹس ولوں پاکستان دے خلاف کھنڈائی ڳئی کوڑیاں اتے من گھڑت خبراں دی سختی نال تردید کیتی اے۔ فیکٹ چیکر جمعہ کوں سماجی رابطے دے پلیٹ فارم “ایکس” تے آپݨی ہک پوسٹ وچ واضح کیتا جو بھارت نال منسلک میڈیا ادارے اتے سوشل میڈیا اکاؤںٹس ڄاݨ ٻجھ تے منظم طریقے نال پاکستان دے خلاف کوڑیاں اتے گمراہ کن خبراں ݙینداں پئے جئیں وچ آکھیا ویندا پئے جو اسرائیل-ایران جنگ اچ پاکستان توں فوجی اڈیاں دا مطالبہ کیتا ڳئے اتے ایہ دعویٰ کیتا ویندا پئے جو پاکستان دی فضائی حداں کوں انٹیلی جنس کٹھی کرݨ کیتے استعمال کیتا ویندا پئے۔ فیکٹ چیکر انہاں ساریاں دعویاں کوں بالکل کوڑ، بے بنیاد، مضحکہ خیز اتے لغو پروپیگنڈا قرار ݙتا اتے آکھیا جو اے سب بھارت دے میڈیا اتے ایں دی پراکسیز ولوں پاکستان کوں بدنام کرݨ دیاں مذموم کوششاں ہن۔
