اسلام آباد۔ 20 جون (اے پی پی) وفاقی وزیر سرمایہ کاری قیصر احمد شیخ آکھیے جو ملک وچ سرمایہ کاری اچ ودھارے کیتے غیر ملکی سرمایہ کاراں کوں پالیسیاں وچ تسلسل دا یقین ݙیواوݨ ضروری اے۔ میثاق معیشت اتے برآمدات تے مبنی نمو نال پاکستان دی معیشت تکھے ترقی کرسڳدی اے ۔ بجٹ وچ ایس ایم ایز کیتے قرضیں دی شرح وچ ودھارا کیتا ڳئے۔قومی اسمبلی وچ آندے مالی سال دے بجٹ تے بحث وچ حصہ گھندے قیصر احمد شیخ آکھیے جو بجٹ اہم دستاویز اے، ملک دے اہم معاشی اشاریے بہتر ہن، مہانگ گھٹ تھئی اے، ترسیلات زر 38 ارب ڈالر توں تجاوز کر ویسن۔ انہاں آکھیے جو بجٹ وچ ایس ایم ایز کیتے قرضے ݙیوݨ سانڳے اقدامات کیتے ڳئن اتے ایں دا حجم ودھیے۔ ایں ویلھے مجموعی قرضے دا چھ فیصد ایس ایم ایز کوں ݙتا ویندا پئے ایں وچ ودھارا ضروری اے۔وفاقی وزیر آکھیے جو غیر ملکی سرمایہ کاری وچ ودھارا ویلھے دی لوڑھ اے، اساں بہوں کوشش کیتی اے اتے ایم او ایز تے دستخط وی کیتن تاں جو ہݨ وی مطلوبہ اہداف حاصل نئیں کیتے ونڄ سڳئے۔ انہاں آکھیا جو خصوصی اقتصادی زونز وچ سہولتاں ݙیوݨ تے آئی ایم ایف وی اتفاق کیتے اتے اے سرمایہ کاری دے حوالے نال ہک وݙا موقع اے۔ سارے صوبیں وچ اے زونز موجود ہن، اساکوں غیر ملکی سرمایہ کاراں کوں پالیسیاں دے تسلسل دا یقین ݙیواوݨا ہوسی، میثاق معیشت دے بغیر سرمایہ کاری نہ آسی۔
