شیخوپورہ۔ 21 جون (اے پی پی) پاکستان مسلم لیگ ن دے سینئر و مرکزی رہنما، وفاقی وزیر نیشنل فوڈ سکیورٹی اینڈ ریسرچ رانا تنویر حسین آکھیے جو فیلڈ مارشل جنرل عاصم منیر دا دورہ امریکہ پاکستان دے وقار، خود مختاری، آزادی و دفاعی میدان وچ ایں دی حیثیت کوں تسلیم کرݨ کیتے سنگ میل ثابت تھیسی ۔امریکی صدر ڈونلڈ ٹرمپ ایں ڳالھ کوں منیے جو پاکستان کوئی دہشت گرد ملک کائنی بلکہ اے ہک پرامن، جمہوریت پسند اتے انسانیت دوست ملک اے جیں دہشت گردی دے خلاف ساریں توں ودھ قربانیاں ݙتن۔ ایں دورے نال ݙوہیں ملکاں وچال اعتماد دی فضا قائم تھیوݨ دے نال ݙو طرفہ تجارتی تعلقات وچ مزید وسعت و استحکام آسی۔ ایں ویلھے ملک دی سیاسی و عسکری قیادت ہک پیج تے ہے جیں دا امریکہ سودھے پوری دنیا کوں ادراک و احساس تھی ڳئے۔او “اے پی پی” نال ڳالھ مہاڑ کریندے پئے ہن ۔ وفاقی وزیر رانا تنویر حسین آکھیے جو ایوان وچ بجٹ تے تھیوݨ آلی بحث دے بعد حکومت ضروری ترمیم کریندی پئی اے۔ وفاقی حکومت عوام تے کہیں طرح دا کوئی ٻوجھ پاوݨ دا ارادہ نی رکھیندی۔ آئی ایم ایف توں قرض گھنݨ ملکی معیشت کوں اپݨے پیراں تے کھڑا کرݨ کیتے ناگزیر ہئی مگر حکومت قرضیں تے مزید انحصار نہ کریسی بلکہ ملکی وسائل کوں معاشی ترقی کیتے استعمال وچ گھن آیا ویسی۔ حالات کِتنے ہی اوکھے کیوں نہ ہوون عام آدمی تے مہانگ دا ٻوجھ اصلوں نہ ودھایا ویسی ۔ عوام کوں مہانگ دے حوالے نال مزید ریلیف ݙیوݨ حکومت دی کلیدی ترجیح اے۔ وفاقی حکومت وانگوں پنجاب حکومت وی عوام دوست بجٹ پیش کیتے اتے عوامی امنگاں دی ترجمانی کریندے عام آدمی دی فلاح و بہبود کیتے بہترین اصلاحات متعارف کروائن۔ پنجاب دے بجٹ کوں وی حتمی منظوری دے بعد وختی نافذ کیتا ویسی جیں نال صوبائی ترقی دی رفتار وچ مزید ودھارا تھیسی۔ موجودہ حکومت عوام کوں مسئلیہں توں کڈھݨ کیتے بھرپور جدوجہد کریندی پئی اے۔ حکومتی اقدامات نال عوام کوں مہانگ دے حوالے نال ریلیف ملئے اتے معاشی و تجارتی سرگرمیاں بحال تھیوݨ نال بے روزگاری وچ وی واضح گھٹکی تھئی اے۔ وختی سارے معاشی مسئلے ختم اتے عوام خوشحال ہوسن۔
