ملتان۔ 21 جون (اے پی پی) چیئرمین سینیٹ سید یوسف رضا گیلانی آکھیے جو پاکستان خطے اچ امن چاہندے ،جنگ کہیں وی مسئلے دا حل کائنی ۔ محترمہ بے نظیر بھٹو شہید دی سالگرہ دے موقع تے ملتان اچ میڈیا نال ڳالھ مہاڑ کریندے ہوئیں سید یوسف رضا گیلانی آکھیا جو قومی اسمبلی اَتے سینیٹ اچ ایران تے اسرائیل دے حملے دے خلاف مذمتی قرارداداں دا مقصد وی علاقائی امن کوں ودھاوا ݙیوݨا اے۔ اقوام متحدہ، عالمی حقوق دیاں تنظیماں اَتے اسلامی ملکاں کوں ایں جنگ دے خاتمے کیتے موثر کردار ادا کرݨا ہوسی۔ انہاں دا آکھݨ ہا جو امن دے حوالے نال دنیا اساݙیاں کوششاں دی ہمیشہ تعریف کیتی۔سید یوسف رضا گیلانی آکھیا جو پاکستان ہک ایٹمی قوت اے اَتے علاقائی سلامتی کیتے اپݨا مثبت کردار ادا کریندا پئے۔ چیئرمین سینیٹ دا آکھݨ ہا جو پاک بھارت کشیدگی دے دوران اساݙیاں فوجاں اے ثابت کیتا جو او دنیا دی بہترین فوج اے اَتے دشمن دی کہیں وی جارحیت دا جواب ݙیوݨ دی صلاحیت رکھیندی اے۔ ہک سوال دے جواب اچ انہاں دا آکھݨ ہا جو اپݨے دور اقتدار اچ انہاں جنوبی پنجاب کیتے بے شمار ترقیاتی کم کیتے ہن۔ جنوبی پنجاب صوبے کیتے جتنی کوشش پیپلز پارٹی کیتی کہیں ٻئے نی کیتی۔ سرائیکی وسیب دے مسئلیں دے حل کیتے انڄ صوبہ ضروری اے جئیں کیتے اساں منظم طریقے نال تحریک چلیسوں تاں جو اتھاں غربت اَتے افلاس دا خاتمہ تھیوے۔محترمہ بے نظیر بھٹو دی سالگرہ دے موقع تے خراج عقیدت پیش کریندے انہاں دا آکھیے جو ایجھی قدآور شخصیت جے اڄ موجود ہوندی تاں موجودہ بحراناں دا خاتمہ تھی ویندا۔ سید یوسف رضا گیلانی آکھیے جو بی بی شہید اَتے ذوالفقار علی بھٹو عوامی لیڈر ہن۔ انہاں غریباں، کساناں، مزدوراں اَتے محنت کشاں کیتے جدوجہد کیتی۔ چیئرمین سینیٹ مزید آکھیا جو انہاں 1987ء توں بی بی شہید دے نال کم کیتا اَتے مقدمات دا سامݨا کیتا، لیکن بی بی دے رلے کھڑے رہیے۔ بعد اچ سید یوسف رضا گیلانی پیپلز پارٹی دے رہنماواں خواجہ رضوان عالم اَتے راؤ ساجد علی دے رلے محترمہ بے نظیر بھٹو دی سالگنڈھ دا کیک وی کٹیا۔ سٹی صدر ملک نسیم لابر، عابدہ بخاری، ساجد بلوچ، ملک منظور ݙمرا سودھے کارکنان دی وݙی تعداد وی موجود ہئی۔
