اسلام آباد۔ 22 جون (اے پی پی) پاکستان ایرانی جوہری تنصیبات تے امریکی حملیں دی مذمت کریندے آکھیے جو اساکوں خطے وچ مزید کشیدگی دے ممکنہ ودھارے تے سخت تشویش اے۔ اساں ایں ڳالھ دا اعادہ کریندوں جو اے حملے بین الاقوامی قوانین دے سارے اصولاں دی خلاف ورزی ہن اتے ایران کوں اقوام متحدہ دے چارٹر دے تحت اپݨے دفاع دا جائز حق حاصل اے۔ دفتر خارجہ توں جاری بیان وچ ترجمان آکھیے جو ایران دے خلاف جاری جارحیت پاروں کشیدگی اتے تشدد وچ غیر معمولی ودھارا ٻہوں پریشان کن اے، کشیدگی وچ مزید ودھارے دے خطے اتے ایں توں ٻاہر کیتے شدید ضیان ݙیوݨ آلے اثرات مرتب تھیسن ۔ ترجمان آکھیے جو اساں شہری جاناں اتے املاک دا احترام کرݨ اتے جھیڑیں کوں وختی مکاوݨ دی لازمی لوڑھ تے زور ݙیندوں ۔سارے فریقاں کوں بین الاقوامی قانون، خاص طور تے بین الاقوامی انسانی قانون دی پابندی کرݨی چاہیدی اے۔ اقوام متحدہ دے چارٹر دے اصولاں اتے مقصد موجب ڳالھ مہاڑ، سفارت کاری دا سہارا خطے دے بحراناں کوں حل کرݨ دا واحد قابل عمل رستہ اے۔
