اسلام آباد۔ 22 جون (اے پی پی) وفاقی وزیر سرمایہ کاری بورڈ قیصر احمد شیخ آکھیے جو پاکستان تکڑے بین الاقوامی تعلقات استوار کرݨ تے توجہ ݙیندا پئے ۔ چین پاکستان دا مخلص اتحادی اے، جئیں دا تعلق سمندراں وانڳوں گھاٹا تے لازوال اے اتے اے آندے سالاں وچ مزید وسیع تھی ویسی۔ اپݨے ہک انٹرویو وچ وفاقی وزیر سرمایہ کاری بورڈ قیصر احمد شیخ آکھیے جو چین دے نال پاکستان دی دوستی دیاں پاڑاں سانجھے اعتماد اتے احترام دی بنیاد تے قائم ہن۔ انہاں ایں ڳالھ تے زور ݙتا جو ݙوہیں ملکاں دے تعلقات ویلھے دی کسوٹی تے ہمیشہ پورے لتھن اتے سانجھے مفادات، اقتصادی تعاون اتے تکڑے سفارتی تعلقات تے قائم ہن۔ انہاں ایں ڳالھ تے روشنی ݙتی جو اے دوستی نہ صرف حکومتی سطح تے اہمیت رکھیندی اے بلکہ ݙوہیں ملکاں دے عوام وچال اتحاد اتے تعاون دے احساس کوں ودھارا ݙیندی اے۔قیصر احمد شیخ چیف آف آرمی سٹاف فیلڈ مارشل سید عاصم منیر کوں سݙݨ تے امریکا دی وی تعریف کیتی اتے ایں کوں ہک اہم سفارتی اشارہ قرار ݙتا۔ انہاں آکھیے جو فیلڈ مارشل سید عاصم منیر دے ایں دورے دی بنیادی توجہ خطے وچ امن کوں ودھارا ݙیوݨ اتے ݙوہیں ملکاں وچال سرمایہ کاری اتے اقتصادی تعاون کوں ودھاوݨ اے۔ انہاں آکھیے جو مسئلہ کشمیر پاکستان کیتے ٻہوں اہم اے۔ انہاں جھیڑے کوں بین الاقوامی قانون اتے اقوام متحدہ دی قرارداداں موجب حل کرݨ کیتے پاکستان دے عزم دا اعادہ کیتا۔انہاں آکھیے جو پاکستان دی عالمی اہمیت وچ ودھارا تھئے اتے خاص طور تے مشرق وسطیٰ وچ اساݙا کردار ٻہوں اہم تھی ڳئے۔ انہاں ایں ڳالھ تے زور ݙتا جو پاکستان مختلف ملکاں نال اپݨے تعلقات کوں تکڑا بݨیندا پئے ، سفارتی تعلقات اتے تعاون کوں ودھارا ݙیندا پئے ۔ انہاں خطے وچ امن کیتے ایران اتے اسرائیل دے مذاکرات دی میز تے آوݨ دی اہمیت تے وی زور ݙتا اتے طویل مدتی استحکام اتے سلامتی کوں یقینی بݨاوݨ کیتے ڳالھ مہاڑ دی لوڑھ تے زور ݙتا۔
