پاکستانی سفیر زور ݙے تے آکھیا جو اسلامی جمہوریہ ایران دے خلاف 13 جون توں جاری حملیاں کوں بین الاقوامی قانون اَتے اقوام متحدہ دے چارٹر دی صریح خلاف ورزی سمجھدے ہوئیں مسترد کریندے اَتے انہاں دی مذمت کریندے۔ انہاں آکھیا جو آئی اے ای اے دی زیر نگرانی ایران دی ایٹمی تنصیبات تے حملیاں دی مذمت کریندن، اے حملے سلامتی کونسل اَتے آئی اے ای دی قرارداداں دے نال نال بین الاقوامی انسانی قانون دی وی خلاف ورزی ہن۔ پاکستانی سفیر آکھیا جو ایرانی جوہری مسئلے دا پرامن اَتے دیرپا حل لبھݨ کیتے اقوام متحدہ دے چارٹر دے مقاصد اَتے اصولاں دے مطابق مذاکرات اَتے سفارت کاری کوں ودھاوݨا چاہیدے۔عاصم افتخار احمد آکھیا جو پاکستان قرارداد دے مسودے دی تیاری اچ چین اَتے روس دی معاونت کیتی، ݙوجھیاں ڳالھیں دے علاوہ ایں قرارداد اچ فوری اَتے غیر مشروط جنگ بندی دا مطالبہ کیتا ڳئے، سارے فریق ٻئی کشیدگی توں گریز کرن تاں جو شہریاں اَتے شہری بنیادی ڈھانچے دا تحفظ یقینی بݨایا ون٘ڄ سڳے، ایرانی جوہری معاملے دا ایجھا سفارتی حل کݙھیا ون٘ڄے جو سارے فریقاں کیتے قابل قبول ہووے۔ انہاں امید ظاہر کیتی جو قرارداد دے مسودے کوں سکیورٹی کونسل دی حمایت حاصل تھیسی، پاکستان ایں سلسلے اچ کونسل دے سارے ارکان نال تعمیری تعاون کیتے تیار اے۔ سفیر آکھیا جو پاکستان شروع توں ہی اصولی موقف اپنایا اے، اساں اسرائیلی جارحیت دی شدید مذمت کریندوں ۔ انہاں دا آکھݨ ہا جو اقوام متحدہ دے چارٹر دے مطابق ایران کوں آپݨے دفاع دے جائز حق کیتے یکجہتی اَتے مکمل حمایت دا اظہار کریندے، ایرانی جوہری تنصیبات تے غیر قانونی حملے دی وی مذمت کریندوں۔ سفیر عاصم افتخار آکھیا جو اساکوں صورتحال کوں مزید قابو توں باہر تھیوݨ توں روکݨ کیتے ہݨے کارروائی کرݨی چا ہیدی اے، سفارت کاری ہی اڳوں ودھݨ دا ہکو قابل عمل رستہ اے اَتے ایہو ایں اجلاس دا آفاقی سنیھا اے۔
