اسلام آباد۔ 23 جون (اے پی پی) وزیراعظم محمد شہباز شریف ادائیگیاں دے ڈیجیٹل نظام “راست” کوں وفاق سودھے سارے صوبیاں اچ قائم کرݨ دی ہدایت کریندیں ہوئیں آکھیا جو معیشت اچ شفافیت گھن آوݨ کیتے ڈیجیٹل لین دین دا نظام قائم کرݨ ٻہوں اہم اے۔ پوری دنیا اچ ترقی یافتہ ملکاں اَتے کامیاب معیشتاں اچ کیش لیس نظام کوں ترجیح ݙتی ویندی پئی اے۔پی ایم آفس دے میڈیا ونگ توں جاری پریس ریلیز موجب سنوار کوں وزیراعظم محمد شہباز شریف دی صدارت اچ کیش لیس اکانومی بارے اجلاس تھیا۔ وزیراعظم محمد شہباز شریف ڈیجیٹل پیمنٹس انوویشن اینڈ ایڈاپشن کمیٹی، ڈیجیٹل پبلک انفراسٹرکچر کمیٹی اَتے گورنمنٹ پیمنٹس کمیٹی ٻݨاوݨ دی ہدایت کیتی۔ اے خصوصی ذیلی کمیٹیاں عوام اَتے کاروباری لوکاں وچال ادائیگیاں کیتے سہولتاں فراہم کرݨ، ڈیجیٹل نظام بارے آگاہی، پاکستان ڈیجیٹل اتھارٹی کوں فعال کرݨ، قومی ڈیجیٹل ماسٹر پلان بݨاوݨ اَتے حکومت اَتے نجی شعبے وچال لین دین کوں سوکھا بݨاوݨ بارے سفارشاں پیش کریسن۔وزیراعظم کیش لیس نظام کوں ودھاوݨ کیتے ڈیجیٹل لین دین کوں عوام کیتے کیش دی نسبت سستا اَتے سوکھا بݨاوݨ دی ہدایت کیتی۔ انہاں ادائیگیاں دے ڈیجیٹل نظام راست کوں وفاق سودھے سارے صوبیاں اچ قائم کرݨ دی ہدایت کریندیں ہوئیں آکھیا جو معیشت اچ شفافیت گھن آوݨ کیتے ڈیجیٹل لین دین دا نظام قائم کرݨ ٻہوں اہم اے۔ پوری دنیا اچ ترقی یافتہ ملکاں اَتے کامیاب معیشتاں اچ کیش لیس نظام کوں ترجیح ݙیتی ویندی پئی اے۔ وزیراعظم آکھیا جو لین دین اَتے ادائیگیاں دے ڈیجیٹل نظام دے قیام کیتے جدید ٹیکنالوجی دا استعمال کیتا ونجے، بینکاری نظام دے تحت گردش کرݨ آلیاں رقماں کوں حکومتی منصوبیاں اچ سرمایہ کاری کیتے استعمال کیتا ون٘ڄ سڳدے۔ انہاں سرکاری اَتے نجی شعبیاں دے وچال لین دین کوں کیش لیس بݨاوݨ دی ہدایت کیتی۔اجلاس اچ وزیراعظم کوں ملک اچ کیش لیس نظام قائم کرݨ کیتے اقدامات دی پیشرفت دے بارے ݙسیا ڳیا۔ بریفنگ اچ ݙسیا ڳیا جو ایں ویلھے راست سسٹم توں 4 کروڑ صارف فیدہ گھندے پئن جنہاں دی تعداد ودھاوݨ کیتے کئی اقدامات کیتے ویندے پئن۔ وفاقی حکومت دے سارے مالی لین دین راست سسٹم دے ذریعے کیتے ویندے پئن اَتے اے نظام صوبیاں اچ وی لاگو کیتا ویندا پئے۔ بریفنگ اچ ݙسیا ڳیا جو فنٹیک ایں ایکو سسٹم دی ہک اہم کڑی اے، پاکستان ڈیجیٹل اتھارٹی قائم کیتی ڳئی اے اَتے ایں دے تحت ملکی معیشت کوں کیش لیس بݨاوݨ تے کم جاری اے۔ ڈیجیٹل پبلک انفراسٹرکچر کمیٹی وفاقی وزارت آئی ٹی دی قیادت اچ کم کریسی۔ بریفنگ اچ ݙسیا ڳیا جو کیش لیس پاکستان سٹیئرنگ کمیٹی وزارت آئی ٹی سیکرٹریٹ اچ قائم اے، سمارٹ اسلام آباد پائلٹ منصوبے دے تحت وزارت آئی ٹی اسلام آباد کوں پاکستان دا پہلا کیش لیس شہر بݨاوݨ کیتے اقدامات کریندی پئی اے۔اجلاس اچ وفاقی وزیر اقتصادی امور احد خان چیمہ، وفاقی وزیر پٹرولیم علی پرویز ملک، وفاقی وزیر آئی ٹی شزا فاطمہ خواجہ، وفاقی وزیر ماحولیاتی تبدیلی ڈاکٹر مصدق مسعود ملک، گورنر سٹیٹ بینک، چیئرمین ایف بی آر اَتے متعلقہ اداریاں دے اعلیٰ افسران شریک ہن۔
