اسلام آباد۔ 23 جون(اے پی پی)نائب وزیراعظم اَتے وزیر خارجہ سینیٹر محمد اسحاق ڈار 24 جون کوں ابوظہبی اچ پاکستان-یو اے ای سانجھے وزارتی کمیشن دے 12ویں اجلاس اچ پاکستانی وفد دی قیادت کریسن۔ ترجمان دفتر خارجہ ولوں سنوار کوں جاری بیان دے مطابق، سانجھا وزارتی کمیشن پاکستان اَتے متحدہ عرب امارات وچال ݙو طرفہ تعاون کیتے اعلیٰ ترین ادارہ جاتی پلیٹ فارم دے طور تے کم کریندے۔ اجلاس اچ ݙوہاں بھرا ملکاں وچال سٹریٹجک، اقتصادی اَتے ترقیاتی تعاون کوں ٻیا تکڑا کرݨ دے ایجنڈے کوں اڳو تے ودھایا ویسی۔ نائب وزیراعظم دی قیادت اچ پاکستانی وفد اچ اقتصادی امور، تجارت، توانائی، میری ٹائم افیئرز اَتے داخلہ سودھا اہم وزارتاں دے سیکرٹریز اَتے سینئر حکام شامل ہوسن۔ متحدہ عرب امارات ولوں نائب وزیراعظم اَتے وزیر خارجہ شیخ عبداللہ بن زاید النہیان وفد دی قیادت کریسن جݙاں جو متعلقہ اماراتی اداریاں دی اعلیٰ سطح دی نمائندگی وی ہوسی۔ اجلاس اچ ݙو طرفہ تعاون دے کئی شعبیاں اچ پیشرفت دا جائزہ ڳِھدا ویسی اَتے تجارت، سرمایہ کاری، توانائی، بنیادی ڈھانچے دی ترقی اَتے آئی ٹی اچ تعاون کیتے نویں راہواں لٻھیاں ویسن۔ شعبہ جاتی تعاون کوں ادارہ جاتی بݨاوݨ کیتے اجلاس دے دوران کئی قانونی دستاویزات کوں حتمی شکل ݙیوݨ دی توقع اے۔ اجلاس ݙوہاں فریقاں کوں اپݨیاں اقتصادی ترجیحات کوں ہم آہنگ کرݨ اَتے باہمی فائدہ مند شراکت داری دے دائرہ کار کوں ودھاوݨ دے امکانات کوں کھولݨ دا ہک اہم موقع فراہم کریسی۔
