اسلام آباد۔ 25 جون (اے پی پی) چیئرمین سینیٹ سید یوسف رضا گیلانی آکھیا جو پاکستان اَتے سعودی عرب دے تعلقات سانجھے عقیدے، تاریخ، مذہبی اَتے ثقافتی مماثلاں تے مبنی ہن۔ چیئرمین سینیٹ اے ڳالھیں سعودی عرب پاکستان فرینڈشپ گروپ دے سربراہ میجر جنرل (ر) ڈاکٹر عبدالرحمن بن سنہت الہربی دی سربراہی اچ وفد نال پارلیمنٹ ہاؤس اچ ڳالھ مہاڑ کریندیں ہوئیں آکھی۔ ملاقات اچ انہاں بطور سپیکر اَتے بطور وزیراعظم سعودی قیادت دے نال تھیوݨ آلیاں اعلیٰ سطح دیاں ملاقاتاں دا وی ذکر کیتا اَتے انہاں کوں تاریخی قرار ݙتا۔ انہاں آکھیا جو اساں ولی عہد دے دورہ پاکستان دے بے تابی نال منتظر ہن۔ چیئرمین سینیٹ نے گزریے سال سعودی عرب دا کامیاب دورہ اَتے بعد اچ چیئرمین شوریٰ کونسل دے پاکستان دے دورے دا ذکر کریندیں ہوئیں آکھیا جو انہاں ݙوہاں دوریاں پارلیمانی سفارت کاری دی اہمیت کوں اجاگر کیتا اے۔سید یوسف رضا گیلانی سینیٹ آف پاکستان اَتے شوریٰ کونسل دے وچال باقاعدہ مکالمے کوں ادارہ جاتی شکل ݙیوݨ دی لوڑھ تے زور ݙتا۔ انہاں سعودی عرب اچ رہندے 25 لکھ توں ودھ پاکستانیاں دے کردار کوں سراہیا جو نہ صرف سعودی معیشت دی ترقی اچ مددگار ہن بلکہ ترسیلات زر دے ذریعے پاکستانی معیشت دا وی ستون ہن۔ چیئرمین سینیٹ اختتامی کلمات اچ پاکستان دی سعودی عرب دے نال برادرانہ تعلقات اچ وابستگی دا اعادہ کیتا اَتے امید ظاہر کیتی جو ݙوہاں ملکاں وچال دوستی دے فروغ کیتے قائم گروپ دیاں کوششاں ہک نویں دور دے آغاز دا سبب بݨسن، جو پائیدار، ترقی یافتہ اَتے مستقبل دے تقاضیاں نال ہم آہنگ ہوسی۔ایں توں پہلے سعودی وفد دے سربراہ پارلیمنٹ ہاؤس پُڄے جتھاں چیئرمین سینیٹ انہاں دا پُرتپاک خیر مقدم کیتا۔ سعودی وفد دے سربراہ چیئرمین سینیٹ دا شکریہ ادا کریندیں ہوئیں آکھیا جو پاکستان خطے دا ہک اہم ملک اے، اَتے ݙوہاں ملکاں ݙو پاسہ تعلقات اَتے کثیر الجہتی تعاون کوں نہایت اہمیت ݙیندے ۔ چیئرمین سینیٹ وفد دے اعزاز اچ ظہرانہ وی ݙتا جئیں اچ اراکین سینیٹ، قومی اسمبلی اَتے پاکستان سعودی عرب فرینڈشپ گروپ دے سربراہ عمر گورگیج اَتے اراکین شرکت کیتی۔ ظہرانے توں خطاب اچ چیئرمین سینیٹ پاکستان سعودی عرب دے تاریخی تعلقات دی اہمیت کوں اجاگر کیتا۔ انہاں آکھیا جو اے دورہ ایں امر دی عکاسی کریندے جو ݙوہاں ملکاں وچال تعلقات، اعتماد اَتے احترام دے جذبے تے مبنی ہن۔
