اسلام آباد۔ 25 جون (اے پی پی) وفاقی وزیر پٹرولیم علی پرویز ملک آکھیے جو پاکستان سونا، تانبا، کولے، نایاب زمینی عناصر اَتے ݙوجھے کریٹیکل منرلز جیڑھے معدنی وسائل نال مالا مال ملک اے جیڑھا جو قابل تجدید توانائی دی منتقلی کیتے ناگزیر سمجھیے ویندن۔ ریکو ڈک منصوبہ نہ صرف پاکستان دی معیشت کیتے سنگ میل اے بلکہ عالمی سطح تے توانائی اَتے معدنیات دیاں ضرورتاں کوں پورا کرݨ اچ اہم کردار ادا کریسی۔ اے ڳالھ انہاں حکومت پاکستان اَتے امریکا دے سفارت خانے دے تعاون نال منعقدہ ہک ویبینار “پاکستان دے کان کَنی دے شعبے اچ موقع – معدنی وسائل دی دریافت” نال خطاب کریندے آکھی۔ ویبینار دا مقصد پاکستان دے معدنیات اَتے کان کَنی دے شعبے اچ سرمایہ کاری دے موقعیں کوں امریکی سرمایہ کاراں اَتے کمپنیاں تئیں پُڄاوݨ ہئی۔ ایں آن لائن ایونٹ دا انعقاد وفاقی وزیر پٹرولیم علی پرویز ملک اَتے امریکا دی پاکستان اچ ناظم الامور نیٹالی بیکر آئل اینڈ گیس ڈویلپمنٹ کمپنی (او جی ڈی سی ایل) دے ہیڈ آفس اچ سانجھے طور تے کیتے۔اپݨے خطاب اچ وفاقی وزیر علی پرویز ملک پاکستان دے کان کَنی دے شعبے دے وسیع امکانات تے روشنی پاتی۔ وفاقی وزیر ریکو ڈِک تانبے اَتے سونے دے منصوبے دی بین الاقوامی اہمیت کوں اجاگر کیتا اَتے بلوچستان دے ضلع چاغی اَتے خیبر پختونخوا اچ وزیرستان دے علاقے اچ اڄوکی دریافتاں متعلق شرکاء کوں آگاہ کیتا۔ علی پرویز ملک پاکستان دے کردار کوں عالمی سطح تے صاف توانائی دی طرف منتقلی دے تناظر اچ اجاگر کریندے ہوئیں ملک دے اہم معدنیات دے وسیع ذخیرے کوں ایں دی سبز منتقلی دی بنیاد قرار ݙتا۔ انہاں آکھیا جو قابل تجدید توانائی دی ترقی اساݙے موسمیاتی اہداف اَتے معاشی مستقبل کیتے مرکزی اہمیت رکھیندی اے، اساں ضروری معدنیات دی کان کَنی کوں سپورٹ کرتے اَتے کاروبار اچ سوکھ کوں بہتر بݨا تے ایں تبدیلی کوں اڳوں ودھیندے پیوں۔وفاقی وزیر آکھیے جو ایں سال دے شروع اچ منعقد تھیوݨ آلے “پاکستان منرلز انویسٹمنٹ فورم 2025 (پی ایم آئی ایف 25)” اچ شرکاء دی تعداد 5 ہزار توں زیادہ ہائی۔ فورم اچ پاکستان دے معدنی ذخیرے دی طرف عالمی سطح تے توجہ مبذول کرائی ڳئی۔ انہاں آکھیا جو پی ایم آئی ایف 25 ہک اہم موڑ ثابت تھیا جیں پاکستان کوں عالمی معدنی معیشت اچ ہک اہم کھݙاری دے طور تے پیش کیتا۔ انہاں امریکی کمپنیاں کوں پبلک پرائیویٹ پارٹنرشپ اَتے سانجھے منصوبیں اچ سرمایہ کاری دی دعوت ݙتی۔ انہاں زور ݙیندے آکھیا جو وزیراعظم شہباز شریف اَتے آرمی چیف فیلڈ مارشل سید عاصم منیر خود پاکستان اچ کان کَنی دے شعبے دی ترقی دی قیادت کریندے پئن۔ حکومت پاکستان اَتے ایس آئی ایف سی بین الاقوامی کمپنیاں کوں ہر قسم دی سہولت ݙیوݨ کیتے پُرعزم ہن تاں جو پاکستان دے وسیع معدنی ذخیرے کوں بروئے کار گھن آیا ونڄ سڳے۔امریکی ناظم الامور نیٹالی بیکر امریکا اَتے پاکستان وچال طویل المدتی معاشی شراکت داری دی تصدیق کیتی۔ انہاں آکھیا جو پاکستان اچ معدنیات دے شعبے اچ بے پناہ موقع ہن، ریکو ڈِک اچ دنیا دے ساریں توں وݙے تانبے اَتے سونے دے ذخیرے دے نال نال معاشی اصلاحات دے مضبوط عزم دے نال اے امریکی سرمایہ کاراں کیتے سرمایہ کاری دا صحیح ویلھا اے۔ نیٹالی بیکر پاکستان دی اڄوکی پالیسی کوششاں دی تعریف کیتی جنہاں دا مقصد کان کَنی دے شعبے دی صلاحیت کوں ودھاوݨ اے اَتے امریکی سرمایہ کاراں کوں پاکستان اچ سرمایہ کاری کیتے سفارت خانے دی حمایت دی یقین ݙیوائے۔ انہاں آکھیا جو اساں اتھاں رابطیں کوں سوکھا بݨاوݨ اَتے فیدہ مند شراکتاں قائم کرݨ کیتے موجود ہیسے، امریکی سرمایہ کاراں لمبے عرصے توں پاکستان دی ترقی اچ اہم کردار ادا کیتے اَتے اساکوں منرلز شعبے اچ وݙی امید نظر آندی پئی اے۔ ایں موقع تے شرکاء کوں جاری ریگولیٹری اصلاحات دے بارے اچ بریفنگ وی ݙتی ڳئی جیں اچ قومی معدنی ہم آہنگی فریم ورک دی تیاری شامل اے جیں دا مقصد سرمایہ کاری دے طریقہ کار کوں سوکھا بݨاوݨ اَتے وفاقی و صوبائی قوانین کوں ہم آہنگ کرݨ ہئی۔ نیز جیولوجیکل ڈیٹا دی ڈیجیٹلائزیشن اَتے جیولوجیکل سروے آف پاکستان دی اپ گریڈیشن دے ذریعے شفافیت اَتے سرمایہ کاراں کیتے ڈیٹا تئیں رسائی کوں بہتر بݨایا ویندا پئے ۔ امریکی سرمایہ کاراں دے نال سوال و جواب دا سیشن وی منعقد کیتا ڳیا تاں جو کہیں وی ابہام یا سوالاں کوں حل کیتا ونڄ سڳے۔اختتامی کلمات اچ نیٹالی بیکر پاکستان دی معاشی ترقی اَتے ݙو طرفہ اقتصادی تعلقات کوں سپورٹ کرݨ کیتے امریکی حکومت دے عزم دی تجدید کیتی۔ انہاں آکھیا جو اساں پاکستان دی صلاحیت تے یقین رکھیندوں اَتے اساں ایں دے شمولیت تے مبنی، پائیدار ترقی دے سفر اچ سانجھے موقع ݙیکھدوں۔ ویبینار اچ پاکستان دے پٹرولیم ݙویژن دے اعلیٰ عہدیداراں، پاکستان دیاں معروف معدنیات اَتے توانائی کمپنیاں، خصوصی سرمایہ کاری سہولت کونسل (ایس آئی ایف سی) دے نمائندیں، امریکا دے اعلیٰ سفارت کاراں اَتے توانائی دے شعبے نال جُڑی اہم شخصیات شرکت کیتی۔ سیکرٹری پٹرولیم مومن آغا، او جی ڈی سی ایل دے منیجنگ ڈائریکٹر احمد حیات لک، جی ایچ پی ایل اَتے ماری انرجیز دے منیجنگ ڈائریکٹرز، ڈائریکٹر جنرل مائنز، پی ایم ݙی سی دے منیجنگ ڈائریکٹر اَتے آرک میٹلز، بی ایم ای سی، بی ایم آر ایل اَتے پی پی ایل دے اعلیٰ نمائندیں دے علاوہ امریکی سفارت خانے دے اکنامک قونصلر اَتے انرجی افسر وی شرکت کیتی۔ جݙاں جو کئی امریکی کاروباری نمائندیں بطور آن لائن شرکاء ویبینار اچ حصہ ڳِھدا۔
