اسلام آباد۔ 25 جون (اے پی پی) وفاقی وزیر قومی صحت سید مصطفیٰ کمال آکھیے جو پاکستان سال 2030 اچ آبادی دے لحاظ نال دنیا دا چوتھا وݙا ملک بݨ ویسی۔ پاکستان اچ شرح تولید 3.6 فیصد اے جیں کوں گھٹ کرتے 2 تئیں گھن آوݨا اے۔ ملک اچ سیوریج ٹریٹمنٹ دا کوئی موثر منصوبہ موجود کائنی۔ اے ڳالھ انہاں امریکا دی قائم مقام سفیر نیٹلی بیکر نال ملاقات اچ آکھی ۔ ملاقات اچ صحت دے شعبے سودھے ݙو طرفہ تعاون اَتے سانجھی دلچسپی دے امور تے ڳالھ مہاڑ کیتی ڳئی۔ پاکستان اَتے امریکہ دے تکڑے تعلقات ہن۔ صحت دے شعبہ اچ امریکہ دا تعاون اَتے خدمات قابل تحسین ہن۔ امریکی قائم مقام سفیر یو ایس اے دے تعاون نال جاری صحت دے منصوبیں بارے وفاقی وزیر مصطفیٰ کمال کوں ݙسائے۔ ݙوہیں رہنماواں صحت دے شعبے اچ پراݨی شراکت داری دی تعریف کیتی ۔ امریکی حکومت، قائم مقام امریکی سفیر نیٹلی بیکر آکھیا جو امریکی پرائیویٹ فرماں وفاقی وزارت صحت دے ریفارمز اچ سٹریٹیجک پارٹنرشپ کیتے تیار اے۔ سید مصطفیٰ کمال آکھیا جو ہیلتھ کیئر سسٹم کوں بہتر اَتے مضبوط بݨاوݨ کیتے روڈ میپ تشکیل ݙے ݙتے۔ پاکستان دی آبادی تکھے ودھدی پئی اے۔ پاکستان اچ 68 فیصد بیماریاں گندا پاݨی پیوݨ نال کھنڈدیاں پئن ۔ انہاں آکھیے جو صاف پاݨی ݙیوݨ اساݙی پہلی ترجیح اے، صاف پاݨی ݙیوݨ کیتے سیوریج ٹریٹمنٹ دے نظام کوں رائج کیتا ویندا پئے۔
