اسلام آباد۔ 25 جون (اے پی پی) وفاقی وزیر قومی غذائی تحفظ و تحقیق رانا تنویر حسین پاکستان اچ تعینات اقوام متحدہ دے عالمی ادارہ خوراک و زراعت (FAO) دی نمائندہ فلورنس رولے نال ملاقات کیتی۔ پاکستان کوں پیش آوݨ آلے زرعی چیلنجز، قومی غذائی تحفظ کوں یقینی بݨاوݨ اَتے زرعی شعبے کوں موسمیاتی تبدیلیاں نال ہم آہنگ بݨاوݨ تے تعاون ودھاوݨ متعلق امور تے تفصیلی ڳالھ مہاڑ کیتی ڳئی۔ایں موقع تے ݙوہیں فریقاں ایں ڳالھ تے تشویش دا اظہار کیتا جو موسمیاتی تبدیلی دے منفی اثرات پاکستان دی زراعت تے ݙینھ و ݙینھ ودھدے پئن۔ غیر متوقع موسم، لمبی خشک سالی اَتے کیڑے مکوڑیاں دے حملے فصلاں دے نظام کوں متاثر کریندے پئن، جیں نال خاص طور تے نکے کسان شدید متاثر تھیندے پئن۔ وفاقی وزیر آکھیے جو پاکستان ہک زرعی معیشت اے جو موسمیاتی اثرات کیتے نہایت حساس اے، لہٰذا ضروری اے جو جدید، پائیدار اَتے سائنسی بنیاداں تے مبنی طریقے اپنائے ونڄن تاں جو فصلاں اَتے مال ڈھور ݙوہیں کوں محفوظ رکھیا ونڄ سڳے۔رانا تنویر حسین حکومت دے انہاں اقدامات تے روشنی پاتی جنہاں دا مقصد زرعی پیداوار کوں بہتر بݨاوݨ اے، جیں اچ تصدیق شدہ بجاں اَتے کھاداں دی دستیابی، جدید زرعی مشینری دا ودھارا اَتے آبپاشی دے جدید طریقے شامل ہن۔ محترمہ فلورنس رولے پاکستان دی زرعی ترقی کیتے کیتی وںڄݨ آلی حکومتی کوششاں دی تعریف کیتی تے ایف اے او دی طرفوں تکنیکی اَتے اسٹریٹجک معاونت جاری رکھݨ دا یقین ݙیوائے۔ انہاں زرعی اجناس دی ویلیو چین کوں بہتر بݨاوݨ، فصل دی کٹائی دے بعد تھیوݨ آلے ضیان کوں گھٹ کرݨ تے کساناں کیتے ڈیجیٹل ٹیکنالوجی دے ودھارے تے زور ݙتا ۔ نال ہی تریمتاں اَتے نوجوان کساناں دی تربیت و شمولیت کوں وی اہم قرار ݙتا۔ملاقات دے مکݨ تے ݙوہیں فریقاں ایں ڳالھ تے اتفاق کیتا جو وزارت اَتے ایف اے او دے وچال نیڑے اشتراک نال نہ صرف پاکستان دے خوراکی نظام کوں تکڑا بݨایا ونڄ سڳدے بلکہ زرعی ترقی کوں پائیدار خطوط تے استوار کرتے قومی خوشحالی اچ وی ودھارا کیتا ونڄ سڳدے
