اسلام آباد۔ 25 جون (اے پی پی) چیئرمین سینیٹ سید یوسف رضا گیلانی آکھیے جو پارلیمانی جمہوریت دے ودھارے کیتے پارلیمان اَتے میڈیا وچال تکڑے اَتے موثر رابطے ضروری ہن، موجودہ دور میڈیا دا اے اَتے میڈیا موجودہ دور اچ ترقی کریندے جدید خطوط تے خود کوں استوار کیتے، میڈیا دی ہمیشہ توں کلیدی حیثیت رہی اے اَتے عوام دے حق معلومات دا محافظ اے، میڈیا نمائندیں دی محنت، دیانت اَتے حقائق تے مبنی رپورٹنگ عوام کوں باخبر اَتے نظام کوں جوابدہ بݨیندی اے، ہک شفاف پارلیمان اَتے آزاد میڈیا ہی جمہوریت دی حقیقی روح ہن۔ پارلیمنٹ ہاؤس اچ پارلیمانی رپورٹرز ایسوسی ایشن دے ارکان دے اعزاز اچ ݙتے ڳئے ظہرانے نال خطاب کریندے سید یوسف رضا گیلانی میڈیا دے کردار کوں ناگزیر قرار ݙتا اَتے آکھیا جو تہاݙا قلم عوام اَتے اقتدار وچال ہک پُل اے، سچائی کوں موثر انداز اچ اجاگر کرݨ، اداریں کوں مزید تکڑا بݨاوݨ اَتے قومی یکجہتی دے ودھارے اچ میڈیا دا کردار انتہائی رکھیندے ، اڄ دے موجودہ دور اچ ذمہ وار صحافت دی لوڑھ پہلے توں کتھائیں زیادہ تھی چُکی اے، نقلی خبراں اَتے ڈیجیٹل پلیٹ فارمز تے کھنڈݨ آلی غلط معلومات عوامی اعتماد کوں سبوتاژ کریندن۔انہاں آکھیے جو بطور وزیراعظم پاکستان، سپیکر قومی اسمبلی اَتے ہݨ بطور چیئرمین سینیٹ میڈیا دے ودھارے اَتے میڈیا نمائندیں دے مسئلیں دے حل کیتے کئی اقدامات چاتن۔ انہاں آکھیے جو میݙا تعلق وی شعبہ صحافت توں رہیے اَتے میݙے خاندان دی سیاست اچ خدمات 450 سال تے محیط ہن۔ انہاں آکھیے جو میں متفقہ طور تے سینیٹ دا چیئرمین منتخب تھیاں۔ سید یوسف رضا گیلانی آکھیے جو شہید ذوالفقار علی بھٹو پاکستان کوں 1973ء دے آئین دا تحفہ ݙتا اَتے بی بی شہید بے نظیر بھٹو میثاق جمہوریت بݨا تے اہم کارنامہ سرانجام ݙتا جیں اچ آئین کوں اصل حالت اچ بحال کیتا ڳئے جو ہک ٻہوں وݙا اَتے اوکھا کم ہئی، اے پارلیمنٹ اَتے عوام دی طاقت ہائی جو آئین پاکستان کوں اصل حالت اچ بحال کیتا ڳئے۔ سید یوسف رضا گیلانی آکھیا جو پاکستان دے ایوان بالا صحافیاں دے حقوق دے تحفظ کیتے نمایاں قانون سازی عمل اچ گھن آئی اے اَتے انہاں کوں پیش آوݨ آلے چیلنجز دے حل کیتے وی موثر حکمت عملی اَتے اقدامات چاتن۔ انہاں ایں امید دا اظہار کیتا جو پارلیمانی رپورٹرز عوام تئیں حقائق تے مبنی معلومات دا سبب بݨسن اَتے میں یقین ݙوینداں جو پارلیمانی صحافیاں کوں جو وی مسئلے پیش ہن، انہاں دے حل کیتے موثر اقدامات چاتے ویسن۔ انہاں آکھیے جو او بین الپارلیمانی سپیکرز کانفرنس دے بانی ہن جو پاکستان اَتے مییں کیتے وݙے اعزاز دی ڳالھ اے۔ سید یوسف رضا گیلانی اپݨے صحافت دے استاداں کوں وی خراج تحسین پیش کریندے آکھیا جو اے انہاں دی محنت دا نتیجہ اے جو میں اڄ تہاݙے سامݨے انہاں عہدیں تے کم کیتا۔ سید یوسف رضا گیلانی پی آر اے ممبران دے سوالاں دے تفصیلی جوابات وی ݙتن۔چیئرمین سینیٹ پی آر اے دے صدر اَتے سیکرٹری جنرل دی طرفوں چاتے ڳئے معاملات کوں حل کرݨ دا یقین ݙیوائے اَتے آکھیا جو “آوݨ آلے ویلھے اساں سارے رَل تے ہک نویں دور دا آغاز کروں جتھاں سچائی، اصول پسندی اَتے پیشہ ورانہ صحافت کوں بالادستی حاصل ہووے، جتھاں پارلیمان دا کردار واضح اَتے عوامی فہم موجب ہووے اَتے میڈیا و پارلیمان دی شراکت داری سانجھے احترام اَتے ادارہ جاتی مضبوطی دی بنیاد تے استوار ہووے”۔ انہاں صحافیاں دیاں ودھ ساری خدمات تے دلوں شکریہ ادا کریندے آکھیا جو “اساں رَل تے جمہوریت دے ایں عظیم سفر کوں اڳوں ودھیسوں، ہک باخبر، بااختیار اَتے متحد قوم دی تعمیر دے پاسے ویسوں “۔ انہاں آکھیا جو عوام اَتے ملک دی ترقی و خوشحالی کیتے میڈیا دیاں خدمات کوں خراج تحسین پیش کرینداں۔ ظہرانے اچ ڈپٹی چیئرمین سینیٹ سیدال خان، سیکرٹری سینیٹ سید حسنین حیدر اَتے پی آر اے دے ممبران وݙی تعداد اچ شرکت کیتی
