مظفرگڑھ۔ 26 جون (اے پی پی) وزیرستان اچ فتنہ الخوارج دے دہشت گرداں دے خلاف آپریشن اچ شہید تھیوݨ آلے مظفرگڑھ دے مضافاتی قصبہ بدھ اسٹیشن دے رہائشی کاشف نواز دی نماز جنازہ ادا کرݨ دے بعد انہاں کوں مکمل فوجی اعزاز نال سپرد خاک کر ݙتا ڳیا۔ نماز جنازہ اچ پاک فوج دے افسراں سودھے علاقہ دے ہزاراں لوکاں شرکت کیتی۔شہید دے جسد خاکی دی تدفین دے موقع تے پاک فوج دے چاک و چوبند دستے پورے فوجی اعزاز نال سلامی پیش کیتی اَتے شہید دی آخری آرام گاہ تے صدر مملکت، آرمی چیف اَتے کور کمانڈر ولوں پھلاں دی چادر چڑھائی ڳئی۔ پاک فوج دے افسراں شہید دے لواحقین کوں حوصلہ ݙتا۔ اہل خانہ اَتے عزیز و اقارب آکھیا جو شہید کاشف نواز وطن عزیز دی حفاظت کریندیں ہوئیں شہید تھئے، ایں ڳالھ تے اساکوں فخر اے اَتے اساں آپݨے رب دا شکر ادا کریندوں۔ شہید کاشف نواز دے نماز جنازہ اچ آئے ہوئیں وسیب واسیاں آکھیا جو دہشت گرداں دے خلاف پاک فوج دیاں قربانیاں کوں سلیوٹ پیش کریندوں۔ شہید کاشف نواز دی نماز جنازہ اَتے تدفین دے موقع تے اہل علاقہ پاک فوج زندہ باد اَتے پاکستان پائندہ باد دے نعرے لا تے شہید کاشف نواز اَتے پاک فوج دے حضور خراج عقیدت پیش کیتا۔
