مظفرگڑھ۔ 27 جون (اے پی پی) تحصیل علی پور اچ فتح پور روڈ تے وستی سیال اچ مین٘ہہ پاروں ݙِھݨ آلی کندھ تلوں آ تے ہک بندہ اتے ہک نکا ٻال جاں ٻحق تھی ڳئیا۔ریسکیو کنٹرول روم موجب مظفرگڑھ دی تحصیل علی پور اچ فتح پور روڈ تے وستی سیال اچ گھر دی پکی کندھ مین٘ہہ پاروں ݙِھہ پئی، جئیں دے نیڑے لنگھدے ہوئیں ݙو بندے کندھ دے تلوں آ تے جاں بحق تھی ڳئے۔ ریسکیو ذرائع دے مطابق گھر اچ مین٘ہہ دا پاݨی کندھ دے نال کٹھا تھی ڳیا ہا جئیں کوں کڈھیندے ہوئیں کندھ گلی توں لنگھدے ہوئیں ݙو بندیاں اُتے ݙِھہ پئی، جئیں دے نتیجے اچ تحصیل علی پور دے موضع فتح پور دی وستی سیال دے رہائشی 40 سالہ رانجھا ولد غلام محمد اَتے 11 سالہ حسن علی ولد ریاض جاں بحق تھی ڳئے۔ ریسکیو ٹیم جاں بحق تھیوݨ آلیاں دیاں لاشاں کوں ورثاء دے حوالے کر ݙتے۔
