اسلام آباد۔ 27 جون (اے پی پی) سپیکر قومی اسمبلی سردار ایاز صادق نال ایرانی سفیر رضا امیری مقدم ملاقات کیتی جیں اچ ݙوپاسے تعلقات سودھے اہم علاقائی اَتے عالمی امور تے ڳالھ مہاڑ کیتی ڳئی اَتے ایں ڳالھ کوں چنڳاں قرار ݙتا ڳئے جو پاکستان اَتے ایران وچال تعلقات ہر گزردے ݙینھ دے نال تکڑے توں تکڑے تھیندے پئن۔ ملاقات اچ ڈپٹی سپیکر قومی اسمبلی سید غلام مصطفی شاہ اَتے وفاقی وزیر داخلہ سید محسن نقوی وی موجود ہن۔سپیکر قومی اسمبلی ایں موقع تے آکھیے جو ݙوہیں بھرا ملکاں دے تعلقات مذہب، تاریخ اَتے ثقافت دے تکڑے رشتے اچ گھنڈئے پئن ، اسرائیل دا ایران تے حملہ بین الاقوامی قوانین دی صریحاً خلاف ورزی اے جیڑھا جو خطے اَتے دنیا دے امن کیتے شدید خطرہ اے۔ سپیکر قومی اسمبلی ایران اَتے اسرائیل وچال جنگ بندی دے اعلان دا خیر مقدم کیتا اَتے آکھیے جو دنیا کوں ایں ویلھے جنگاں دی نی، امن دی لوڑھ اے، پاکستان خطے اچ ہمیشہ امن کوں ودھاوݨ کیتے کردار ادا کیتے۔ انہاں آکھیے جو پاکستان بھارتی جارحیت دا موثر اَتے مُنہ بھن جواب ݙتے، پاکستان اَتے بھارت جنگ اچ بھارت اسرائیل ڳٹھ جوڑ واضح تھی ڳئے، ایران اَتے پاکستان دی فتح ݙوہیں ملکاں دے تعلقات کوں مزید مستحکم کریسی، ایران-اسرائیل جنگ اچ بھارت دا منفی کردار ایران کوں بھارت نال تعلقات دا ول جائزہ گھنݨ دا موقع ݙیندے۔انہاں آکھیے جو اسرائیلی حملیں اچ فلسطین اچ پنجاہ ہزار توں ودھ انسانی جاناں دا ضیان ہر پاکستانی کیتے دل ݙکھاوݨ آلا سانحہ اے، پاکستان دی پارلیمان اَتے عوام ایران دی عوام دے نال مکمل یکجہتی دا اظہار کریندن، پاکستان دی پارلیمان ساریں توں پہلے قرارداد دے ذریعے ایران تے حملے دی مذمت کیتی۔ انہاں آکھیے جو تقریباً ݙو سو توں ودھ ارکان پارلیمنٹ بجٹ 2025-26 دی تقریراں وچال ایران دے نال یکجہتی دا اعادہ کیتے، ایران اسرائیل جنگ اچ بھارت دا کردار اَتے رویہ منفی رہیے، پاکستان-بھارت اَتے ایران-اسرائیل جنگ پوری دنیا کیتے پیغام اے جو دنیا کوں امن دی لوڑھ اے، اسرائیلی اقدام علاقائی امن و سلامتی کیتے سنگین خطرہ اے، عالمی برادری بین الاقوامی قوانین دی خلاف ورزی دا نوٹس گھنے۔سپیکر قومی اسمبلی خطے دے امن و استحکام کیتے اسرائیلی اشتعال انگیزی کوں روکݨ دی لوڑھ تے زور ݙتا اَتے آکھیے جو اسرائیلی حملے بین الاقوامی قوانین اَتے اقوام متحدہ دے چارٹر دے خلاف ہن، ایران پاکستان دا قابل اعتماد بھرا ہمسایہ ملک اے، پاکستان ایران نال پارلیمانی و اقتصادی شعبیں اچ تعاون کوں مزید وسعت ݙیوݨ کیتے پرعزم اے، ݙوہیں ملکاں اچ پارلیمانی رابطے ݙو طرفہ تعلقات کوں مستحکم بݨاوݨ اچ اہم کردار ادا کرسڳدن، ایران دے نال پارلیمانی و اقتصادی رابطیں کوں ودھاوݨ اساݙیاں ترجیحات اچ شامل اے، پارلیمانی رابطے عوام وچال فاصلے گھٹ کر سڳدن۔ انہاں آکھیے جو خطے اچ امن و استحکام کیتے ݙوہیں ہمسایہ ملکاں دا کردار کلیدی اہمیت رکھیندے۔ایرانی سفیر آکھیے جو ایرانی عوام اَتے حکومت پاکستان دی عوام، حکومت، پارلیمان اَتے میڈیا دا دلوں شکر گزار اے۔ پاکستان اوکھے ویلھے ساتھ ݙے تے ثابت کیتے جو او ایران دا سچا دوست اے۔ ایرانی سفیر سپیکر قومی اسمبلی دا شکریہ ادا کیتا جو انہاں ساریں توں پہلے اظہار یکجہتی کیتا، پاکستان سارے عالمی فورمز تے ایران دی حمایت کیتی جیں دا ایران دلوں شکر گزار اے۔ انہاں آکھیے جو ایران دی پارلیمنٹ اَتے حکومت پاکستان دے وزیراعظم محمد شہباز شریف، پارلیمان اَتے فیلڈ مارشل سید عاصم منیر دے دلوں شکر گزار ہن۔ انہاں آکھیے جو اسرائیل دے حملے دا مقصد بنیادی طور تے ایران دے ایٹمی پروگرام کوں ضیان پڄاوݨ ہئی، اسرائیل دی کمزور صورتحال پاروں امریکہ ایں جنگ اچ براہ راست رلیا ، خطے اچ امن و استحکام کیتے پاکستان دا کردار قابل ستائش اے۔ ایرانی سفیر رضا امیری مقدم ݙو طرفہ تعلقات تکڑے بݨاوݨ کیتے پارلیمانی تعاون دی اہمیت دی تعریف کیتی تے آکھیے جو ݙوہیں ملکاں اچ رابطے کوں ودھاوݨ اچ کردار قابل تحسین اے۔
