اسلام آباد۔ 27 جون (اے پی پی) وزیراعظم محمد شہباز شریف آکھیے جو حکومت کھیݙ دے ہر میدان اچ میرٹ دی بنیاد تے ٹیلنٹ کوں ودھاوݨ کیتے کوشاں اے، کرکٹ سودھے کھیڈ دے ہر میدان اچ مرد و خواتین کوں ہکو جیہے موقع اَتے سہولتاں ݙیوݨ اساݙیاں ترجیحات اچ شامل اے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف نال پاکستان ویمن کرکٹ ٹیم دی سابق کپتان اَتے ممتاز کرکٹر ثناء میر ملاقات کیتی۔ وزیراعظم انٹرنیشنل کرکٹ کونسل دے ہال آف فیم اچ ثناء میر دا ناں شامل تھیوݨ تے انہاں کوں مبارخ ݙتی۔ وزیراعظم پاکستان ویمن کرکٹ ٹیم دی کپتان دے طور تے ثناء میر دی کارکردگی دی تعریف کریندے تہاݙی زیر قیادت پاکستان ویمن کرکٹ ٹیم نمایاں کامیابیاں حاصل کیتیاں اَتے پاکستان دا ناں دنیا اچ روشن کیتا، امید اے جو تساں اپݨے تجربے نال نویں ٹیلنٹ کوں کرکٹ دے حوالے نال تربیت ݙیوݨ اچ فعال کردار ادا کریسو۔ثناء میر وزیراعظم دا شکریہ ادا کریندے آکھیے جو میری پوری کوشش اے جو ورلڈ کرکٹ ایسوسی ایشن اَتے آئی سی سی اچ پاکستان دی بھرپور نمائندگی کراں۔ ثناء میر پاکستان اچ کرکٹ بالخصوص خواتین دی کرکٹ کوں مزید ودھاوݨ دے حوالے نال تجویزاں ݙیندے آکھیے جو امید اے جو حکومت پاکستان اچ کرکٹ دے میداناں اَتے نویں ٹیلنٹ دے ودھاوݨ اَتے خصوصاً خواتین دی کرکٹ کیتے مزید موقع پیدا کرݨ کیتے اقدامات کریسی۔
