راولپنڈی۔ 27 جون (اے پی پی) چیف آف آرمی سٹاف فیلڈ مارشل سید عاصم منیر آکھیے جو ملک دی ترقی اَتے کامیابی کیتے عوام، حکومت اَتے افواج دے وچال تکڑا تعلق ناگزیر اے، اساں ہندوستان کوں واضح پیغام ݙیندوں جو پاکستان نہ پہلے ہندوستان دی اجارہ داری قبول کیتی اَتے نہ کݙاہیں کریسی۔ آئی ایس پی آر توں جاری بیان موجب چیف آف آرمی سٹاف فیلڈ مارشل سید عاصم منیر 52ویں کامن ٹریننگ پروگرام دے افسراں نال خطاب کیتا۔ انہاں آکھیا جو ملک دی ترقی اَتے کامیابی کیتے عوام، حکومت اَتے افواج دے وچال تکڑا تعلق ناگزیر اے، ریاست دیاں ساریاں اکائیاں دے وچال ہم آہنگی دی اساس پاکستان دی انتظامیہ اَتے سول بیوروکریسی اے، ایں دی بھاری اَتے اہم ذمے واری تہاݙے تے عائد تھیندی اے۔ فیلڈ مارشل سید عاصم منیر آکھیے جو معرکہ حق اچ ریاست دیاں ساریاں اکائیاں مثالی ہم آہنگی دا مظاہرہ کیتا، معرکہ حق اچ پاکستان کشمیر لائن آف کنٹرول توں گھن تے ساحل سمندر تئیں ہندوستان دی بلا جواز جارحیت دے خلاف بہترین جواب ݙتا، اللہ معرکہ حق اچ اساݙی مدد کیتی کیوں جو اساں حق تے ہاسے۔انہاں آکھیا جو افواج پاکستان دور حاضر دے جنگی تقاضیں موجب اپݨے آپ کوں ہر ویلھےتیار رکھیندی اے، اساں ہندوستان کوں واضح پیغام ݙیندوں جو پاکستان نہ پہلے ہندوستان دی اجارہ داری قبول کیتی اَتے نہ کݙاہیں کریسی، دہشت گردی ہندوستان دا اندرلا مسئلہ اے جو ایں دا اپݨیاں اقلیتاں بالخصوص مسلماناں تے متعصبانہ اَتے ظالمانہ رویں دا نتیجہ اے، خطے اچ دہشت گردی دا ساریں توں وݙا سرپرست ہندوستان اے۔ فیلڈ مارشل سید عاصم منیر آکھیے جو بحیثیت قوم اساں پاکستانی کݙاہیں وی ہندوستان دے اڳوں جھکیوں اَتے نہ جھکسوں، افغانستان اساݙا بھرا پڑوسی اسلامی ملک اے اَتے اساں ایں نال چنڳے تعلقات چاہندوں تاںجو اساں انہاں توں ہک ہی تقاضا کریندوں جو او ہندوستان دیاں دہشت گردانہ پراکسیاں فتنہ الہندستان اَتے فتنہ الخوارج کوں جاہ نہ ݙیون۔ انہاں آکھیا جو اپݨی انفرادی اَتے علاقائی سنڄاݨ توں ودھ تے پاکستانیت دی سنڄاݨ کوں اپناون۔ انہاں آکھیا جو ہر نظام اچ مسئلے اَتے کمزوریاں ہوندئن، تہاݙا کم اے جو کمزوریاں اَتے منفی قوتاں کوں نظام تے حاوی نہ تھیوݨ ݙیو، جیڑھیاں قوماں اپݨی تاریخ کوں بُھل ویندیاں ہن انہاں دا مستقبل وی تاریک تھی ویندے، پاکستان دی کہانی اَتے تاریخ کوں ڄاݨو اَتے اپݨیاں اڳلیاں نسلاں تئیں پڄاؤ۔ فیلڈ مارشل سید عاصم منیر آکھیا جو ملک نال محبت اَتے وفاداری اولین اَتے بنیادی شرط اے، اپݨے اندر جرات، قابلیت اَتے کردار پیدا کرو اَتے جیکر انہاں وچوں ہک جزو کوں چُݨݨا ہووے تاں ہمیشہ کردار کوں فوقیت ݙیوݨی اے۔
