اسلام آباد۔ 27 جون (اے پی پی) نائب وزیراعظم اَتے وزیر خارجہ سینیٹر محمد اسحاق ڈار اسرائیل کوں بطور ریاست تسلیم کرݨ دیاں قیاس آرائیاں کوں یکسر مسترد کریندے ہوئیں فلسطین دے مسئلے دا ݙو ریاستی حل طے تھیوݨ تئیں اسرائیل کوں تسلیم نہ کرݨ دے پاکستان دے اصولی موقف دا اعادہ کیتے۔ نائب وزیراعظم اے ڳالھ اتھاں دفتر خارجہ اچ میڈیا کوں پاکستان دیاں کامیابیاں اَتے سفارتی مصروفیات دے بارے بریفنگ ݙیندے ہوئیں کیتی۔انہاں آکھیا جو پاکستان ہمیشہ 1967ء توں پہلے دی سرحداں دی بنیاد تے ہک آزاد اَتے خودمختار قابل عمل فلسطینی ریاست دے قیام دے نال فلسطین دے مسئلے دے ݙو ریاستی حل دی حمایت کیتی اے جیں دا دارالحکومت القدس الشریف ہووے۔ انہاں آکھیا جو پاکستان اَتے امریکہ ٹیرف مذاکرات اچ تکھے اڳوں ودھدے پئن، توقع اے جو ݙوہیں ملک ایں مسئلے دا مناسب حل کڈھ گھنسن۔ نائب وزیراعظم آکھیے جو پاکستان اڄوکے پاک بھارت کشیدگی دے دوران جنگ بندی یا مذاکرات دا نئیں آکھیا تاں جو انہاں واضح کیتا جو پاکستان بھارت دے نال جھیڑا جموں و کشمیر سودھے سارے تصفیہ طلب جھیڑیں تے باوقار انداز اچ جامع ڳالھ مہاڑ کیتے تیار اے۔ انہاں آکھیا جو اے پہلی واری اے جو بھارت دے نال کشیدگی دے دوران پاکستان دے بیانیے کوں عالمی سطح تے تسلیم اَتے تعریف کیتی ڳئی ۔ انہاں آکھیا جو پاکستان آوݨ آلے مہینے اقوام متحدہ دی سلامتی کونسل دی صدارت سنبھال گھنسی ۔انہاں اپݨے اڄوکے دورہ ترکیہ اَتے متحدہ عرب امارات بارے اچ ذرائع ابلاغ کوں ݙسایا جِتھاں پاکستان فلسطین، کشمیر، اسلامو فوبیا اَتے ایران کشیدگی سودھے اہم مسئلیں تے علاقائی امن دے اقدامات، ݙو طرفہ تعاون اَتے کثیر الجہتی سفارت کاری اچ فعال کردار ادا کیتا۔ سینیٹر محمد اسحاق ڈار استنبول اچ 20 توں 23 جون تئیں منعقد تھیوݨ آلے اسلامی تعاون تنظیم دے وزرائے خارجہ دی کونسل دے اجلاس اچ شرکت دا وی ذکر کیتا۔انہاں آکھیا جو اسرائیل ایران جنگ اَتے کشیدگی دے پیش نظر او آئی اجلاس دے دوران ایران کیتے ہک اجلاس سݙاوݨ اچ پاکستان اہم کردار ادا کیتا، پاکستان دی کوشش نال او آئی سی اجلاس اچ ایران دے معاملے تے خصوصی سیشن تھیا۔ نائب وزیراعظم آکھیا جو اجلاس دے دوران پاکستان ایران دی خودمختاری اَتے اشتعال انگیزی دے خلاف تحمل دی حمایت اچ او آئی سی دے مضبوط اجتماعی موقف دی وکالت کیتی۔ انہاں آکھیا جو ایران پاکستان دی وختی اَتے ثابت قدم حمایت کوں تسلیم کیتا۔سینیٹر محمد اسحاق ڈار آکھیا جو ایران دے صدر مسعود پیزشکیان ایرانی پارلیمنٹ توں خطاب دے دوران پاکستان دی طرفوں سفارتی یکجہتی دی تعریف کیتی ۔ انہاں آکھیا جو چیف آف آرمی سٹاف فیلڈ مارشل عاصم منیر وی ہک باوقار جنگ بندی کیتے ترکیہ اَتے ایرانی قیادت نال ڳالھ کیتی۔ نائب وزیراعظم آکھیا جو پاکستان جھیڑے دے دوران تہران دے نال مسلسل رابطے اچ رہیا، مدد دی پیشکش کیتی اَتے پس پردہ سفارت کاری دی سہولت ݙتی ۔ انہاں آکھیا جو ایران دی جوابی کارروائی اَتے ایں دے نتیجے اچ جنگ بندی دے معاہدے کوں علاقائی تناؤ دی تخفیف دے پاسے قدم دے طور تے ݙٹھا ڳیا جیں امن دی رفتار کوں برقرار رکھݨ اچ پاکستان دیاں کوششاں کوں اہم قرار ݙتا۔نائب وزیراعظم آکھیا جو پاکستان دی کوشش نال مقبوضہ کشمیر تے او آئی سی دے رابطہ گروپ دا وی اجلاس تھیا، او آئی سی دے اجلاس دے موقع تے جموں و کشمیر تے او آئی سی رابطہ گروپ دا اجلاس پاکستان کیتے کامیاب اقدام ہئی۔ نائب وزیراعظم آکھیا جو میں اپݨے خطاب اچ کشمیریاں دے حق خود ارادیت دا مقدمہ پیش کیتا اَتے بھارتی مظالم کوں بے نقاب کیتا۔ سربراہی اجلاس دے بعد جاری تھیوݨ آلے استنبول اعلامیے اچ جھیڑا کشمیر، فلسطینیاں دی نسل کشی، ودھدے ہوئے اسلامو فوبیا، جنوبی ایشیا اچ علاقائی سلامتی دی صورتحال اَتے سندھ طاس معاہدے دی حمایت دا اعادہ کیتا ڳیا، اے پاکستان کیتے ہک سفارتی کامیابی اے کیوں جو ٻہوں سارے محاذاں تے اساݙی پوزیشن حتمی اعلامیے اچ جامع طور تے ظاہر تھئی اے۔سینیٹر محمد اسحاق ڈار آکھیا جو انہاں آکھیا جو استنبول اچ سعودی عرب، کویت، ایران، ترکیہ، مصر، ملائیشیا، آذربائیجان، ازبکستان، قازقستان، بنگلہ دیش، برونائی اَتے افغانستان دے ہم منصباں دے نال 13 ݙو طرفہ ملاقاتاں کیتیاں۔ انہاں ملاقاتاں اچ تزویراتی موضوعات سرمایہ کاری، رابطے اَتے انسداد دہشت گردی تعاون توں گھن تے پاکستان، افغانستان اَتے ازبکستان دے وچال 624 کلومیٹر دے سہ فریقی ریلوے منصوبے تئیں ڳالھ مہاڑ شامل ہئی۔ انہاں آکھیا جو ملائیشیا 10 جولائی کوں تھیوݨ آلے آسیان سربراہی اجلاس اچ شرکت کیتے دعوت ݙتی اے جیں کوں انہاں قبول کر ڳِھدے جیں نال آوݨ آلے ہفتے اچ مزید علاقائی رسائی دا اشارہ مِلدے۔نائب وزیراعظم ایں موقع تے متحدہ عرب امارات دے اجوکے دورے بارے اچ وی ݙسیا جِتھاں 12 سال بعد پاکستان-یو اے ای مشترکہ وزارتی کمیشن (جے ایم سی) دا اجلاس تھیا۔ انہاں آکھیا جو انہاں دی قیادت اچ 10 رُکنی وفد اچ اہم وزارتاں دے اعلیٰ حکام شامل ہن۔ انہاں آکھیا جو متحدہ عرب امارات سفارتی اَتے سرکاری پاسپورٹ رکھݨ آلیں کوں ویزا دی شرطاں توں مستثنیٰ قرار ݙیوݨ تے اتفاق کیتا اے جو 24 جون کوں مفاہمت دی دستاویز تے دستخط دی تاریخ توں 30 ݙینھ دے بعد لاگو ہوسی۔ انہاں آکھیا جو اساں عام پاکستانیاں کیتے ویزا دے مسلیں اچ نرمی خاص طور تے منشیات دی سمگلنگ یا بھیک منڳݨ جیڑھی مجرمانہ سرگرمیاں تے حراست اچ گھدے ڳئے لوکاں دے متعلق خدشات کوں دور کرݨ تے وی ڳالھ کیتی۔ پاکستانی حکام سکریننگ دے طریقہ کار اچ بہتری دا اشتراک کیتا جیں کوں متحدہ عرب امارات دے حکام تعریف کیتی۔ نائب وزیراعظم آکھیا جو متحدہ عرب امارات دے مالیاتی ذخیرے کوں براہ راست سرمایہ کاری اچ تبدیل کرݨ تے ڳالھ مہاڑ کیتی ڳئی جیں اچ پاکستان دے ایم ایل ون ریلوے منصوبے اچ تجدید دلچسپی وی شامل اے۔انہاں آکھیا جو پاکستان بھارت دے نال کشیدگی دی صورتحال دے دوران تناؤ کوں گھٹ کرݨ اچ امریکی صدر ڈونلڈ ٹرمپ دے کردار کوں تسلیم کریندے انہاں کوں نوبل امن انعام کیتے باضابطہ طور تے نامزد کیتے۔ انہاں آکھیا جو نامزدگی تے وزیراعظم دی مکمل منظوری دے نال 11 جون کوں میݙے دستخط تھیے۔ انہاں ایں ڳالھ دا اعادہ کیتا جو پاکستان بھارت کوں صرف دہشت گردی، کشمیر، تجارت اَتے آبی جھیڑے تے مشتمل جامع مذاکرات اچ شامل کریسی۔ انہاں آکھیا جو اساں دہشت گردی تئیں محدود مذاکرات کوں قبول نہ کریسوں۔محمد اسحاق ڈار جھیڑے دے پرامن حل کیتے پاکستان دے عزم دا اظہار کریندے آکھیا جو پاکستان اقوام متحدہ دی سلامتی کونسل دے وزارتی فورم دے اہم اجلاس دی صدارت کریسی۔ انہاں آکھیا جو اساں ثالثی دی بین الاقوامی تنظیم اچ شامل تھی ڳیوں اَتے جھیڑے دے حل اَتے امن دی تعمیر جیھے موضوعات کوں اڳوں ودھیسوں۔ سینیٹر اسحاق ڈار آکھیا جو پاکستان ہک ذمے وار، امن دے متلاشی اَتے سفارتی طور تے فعال ملک دے طور تے اپݨا مقام ول حاصل کریندا پئے اَتے او عملی مصروفیت دے نال تکڑے اصولاں اچ توازن قائم کریندا پئے۔ انہاں ایں ڳالھ دا اعادہ کیتا جو پاکستان دی قیادت، سویلین اَتے فوجی تعمیری سفارت کاری دے ذریعے خطے اَتے عالمی سطح تے استحکام کوں ودھاوݨ کیتے متحد اے۔
