اسلام آباد۔ 27 جون (اے پی پی) چیئرمین پاکستان پیپلز پارٹی بلاول بھٹو زرداری آکھیے جو پاکستان دے نوجواناں ڈیجیٹل اَتے سوشل میڈیا تے بھارت کوں شکست ݙتی اے، جیکر ݙو ایٹمی طاقتاں وچال جنگ چھڑ ڳئی تاں دنیا دے امن کیتے خطرہ ہوسی، بھارت دی پاݨی بند کرݨ دی تڑی یو این چارٹر دی خلاف ورزی اے، پاکستان اسرائیل کوں تسلیم نہ کریسی۔نیشنل پریس کلب اسلام آباد اچ میٹ دی پریس نال خطاب کریندے ہوئیں انہاں آکھیا جو بھارت دے نال جنگ اچ پاکستان دی فتح کوں تِناں طرحاں منینداں، پاک فوج بھارت دی وݙی فوج کوں شکست ݙتی، سفارتی سطح تے تاریخی کردار ادا کیتا، پاکستان اپݨے بیانیے اچ تاریخی فتح حاصل کیتی، پاکستان دے نوجواناں ڈیجیٹل اَتے سوشل میڈیا تے بھارت کوں شکست ݙتی اے۔ پاکستان دے میڈیا دا کردار تاریخی اے، بین الاقوامی سطح تے پنج ݙینھ اچ پاکستان دے میڈیا تاریخی فتح حاصل کیتی، دنیا پاکستان دے میڈیا دے کردار دی تعریف کیتی ، میڈیا اوکھائی دے باوجود پاکستان دا بیانیہ دنیا دے سامݨے پیش کیتا، اساکوں نوجواناں تے فخر اے۔بلاول بھٹو آکھیا جو صف اول دا کردار تساں صحافیاں دا ہئی جیں دی میں قدر کرینداں، اپݨی ساکھ تے تساں لوکاں سمجھوتہ نئیں کیتا، وزیراعظم صحیح وقت تے صحیح فیصلہ ڳھدا۔ انہاں آکھیا جو وزیراعظم آکھیا ہئی جو پاکستان بین الاقوامی سطح تے تحقیقات کیتے تیار اے، اساݙے ہتھ صاف ہن، بھارت کہیں دے نال اپݨی معلومات ہی شیئر نئیں کیتیاں، جنگ دے دوران پاکستان شفاف ہئی، بھارت جنگ دے دوران نہ صرف میڈیا دے ذریعے بلکہ سفارتکاری ہاٹ لائن دے ذریعے وی کوڑ کھنڈایا ۔ پاکستان ہمیشہ امن دی ڳالھ کیتی، پاکستان دنیا دے سامݨے اپݨا بیانیہ بہترین انداز اچ رکھیا، اساں دنیا اچ امن چاہندوں، اساں امن دی ڳالھ کیتی۔ بھارت تاں اے ڳالھ کریندا ہئی جو پاکستان دہشت گرد اے لیکن دنیا ایں دے ایں بیانیے کوں یکسر مسترد کر ݙتا۔ اساں پاکستانی عوام دے نال نال بھارتی عوام دی وی ڳالھ کریندے پیوں ، نسل در نسل اساں نئیں چاہندے نفرتاں کھنڈدیاں رہن ، نویں نسل بھارت دے نفرت دے پیغام کوں پسند نہ کریسی۔ مقبوضہ کشمیر ہک بین الاقوامی مسئلہ اے، جیکر ݙو ایٹمی طاقتاں وچال جنگ چھڑ ڳئی تاں دنیا دے امن کیتے خطرہ ہوسی۔ بھارت دی سازش ہئی جو پاکستان کوں ہک دہشت گرد ملک ݙسایا ونڄے، اساں ایں دی سازش کوں ناکام بݨایا، اساں فیٹف دی گرے لسٹ کوں وائٹ کر ݙتا، بھارت ہر محاذ تے ناکام تھیا۔ ایں دے بعد امریکہ دے صدر اساݙے فیلڈ مارشل سید عاصم منیر کوں کھاوݨ دی دعوت ݙتی، اے پاکستان دی وݙی کامیابی اے۔بھارت پاݨی بند کرݨ دی تڑی ݙیندے، اے یو این چارٹر دی خلاف ورزی اے، اساں امن چاہندوں ہن، جیکر پاݨی بند کیتا تاں ول جنگ ہوسی اَتے اساں پہلے وانڳوں جتسوں، پاݨی کیتے جنگ کرݨی پئی تاں جنگ کریسوں۔ مودی ہک زمانے اچ گجرات دا قصائی ہئی، ول کشمیر دا قصائی بݨ ڳیا اَتے ہݨ مودی وادی سندھ دی تہذیب دا قصائی بݨݨ چاہندے۔ بھارت چاہے نہ چاہے عوام امن چاہندی اے، نویں نسل امن چاہندی اے، پاکستان اَتے بھارت وچال جنگ بندی دا مطلب مذاکرات ہن، اصولی طور تے بھارت کوں ڈائیلاگ کرݨا چاہیدے۔ بھارتی وزیراعظم پاکستان دے نوجواناں کوں آکھیا جو روٹی کھاؤ نتاں گولی کھاو۔ امریکہ کوشش اچ اے جو جنگ بندی تے بھارت قائم رہوے۔ صدر ٹرمپ دی امن دی کوشش بھارت ناکام کرݨ چاہندے۔ سندھ طاس معاہدہ کوں بھارت ہک طرفہ طور تے ختم نئیں کر سڳدا۔ حقیقت اے اے جو بھارت کوں اندازہ نہ ہئی جو پاکستان دا سخت جواب ہوسی اَتے بھارت جہاز نئیں اُݙائے کیوں جو انہاں کوں ݙر ہا جو انہاں دے جہازڈھا ݙتے ویسن۔ بلاول بھٹو آکھیا جو جیکر مودی اے آکھدے جو بھارت جنگ بندی دی خواہش نئیں کیتی تاں او صرف ہک واری اے آکھ ݙیوے جو ٹرمپ کوڑ مریندے۔بلاول بھٹو آکھیا جو اسرائیل فلسطینی عوام تے ظلم کریندا پیے جیں کوں وختی طور تے روکݨا چاہیدے، پاکستان اسرائیل کوں تسلیم نہ کریسی۔ بلاول بھٹو زرداری آکھیا جو فیلڈ مارشل عاصم منیر جنگ جِتݨ آلے جنرل ہن اَتے اے پاکستان کیتے فخر دی ڳالھ اے جو امریکی صدر پاکستانی فوج دے سربراہ کوں کھاݨے تے سݙیا۔
