اسلام آباد۔ 28 جون (اے پی پی) محکمہ موسمیات ملک دے مختلف علاقیں اچ ساوݨ دا مینھ اتے تکھی ہوا گُھلݨ دی پیش گوئی کریندے آکھیے جو عوام موسم متعلق خطرے توں بچݨ کیتے ضروری احتیاطی تدابیر اختیار کرن۔پی ایم ڈی دے ترجمان انجم نذیر ضیغم اتوار کوں اپݨے ہک انٹرویو اچ ایں ڳالھ تے زور ݙتا جو ساوݨ دے ابتدائی سپیل توں زبردست مینھ وسدا پئے تے آندے کئی ݙینھ اسلام آباد توں کراچی تئیں مزید مینھ وسݨ دی پیش گوئی اے۔ انہاں مزید آکھیے جو توقع اے جو موسمی نظام پورے سندھ دے علاقے کوں متاثر کریندا رہسی اَتے ایں دی شدت اچ مزید ودھارا تھی سڳدے۔ موجودہ مینھ دا سبب بݨݨ آلا ساوݨ دا نظام کراچی اچ اتوار دی سویل تئیں جاری رہݨ دی توقع اے۔ ایں دوران وقفے وقفے نال ہلکا، وچلا اتے تکھا مینھ وسݨ دا امکان اے ۔محکمہ موسمیات وارننگ جاری کیتی اے جو موسلادھار مینھ پاروں شہر دے کجھ علاقیاں کوں شہری چھل دا سامݨا کرݨا پَئے سڳدے ۔ انہاں رہائشیاں کوں تکڑا رہݨ دا مشورہ ݙتا جو شہر دے کجھ علاقیں اچ طوفانی مینھ پاروں شہری چھل دا سامݨا کرݨا پئے سڳدے ۔ انہاں لوکاں کوں مشورہ ݙتا جو او محکمہ موسمیات دی آفیشل ویب سائٹ تے باقاعدگی نال اپ ڈیٹس چیک کرن تاں جو موسم دی تازہ ترین پیش رفت توں باخبر رہن۔ماہر موسمیات عاطف ارشاد وی سیاحواں اَتے عام لوکاں ݙوہیں تے زور ݙتا جو او موسم دی موجودہ صورتحال وچال محتاط اَتے چوکس رہن۔ انہاں مزید آکھیے جو سارے متعلقہ حکام بشمول واسا، این ڈی ایم اے اَتے پی ݙی ایم اے ہائی الرٹ تے ہن اَتے ساوݨ دے ایں سپیل دے دوران پیدا تھیوݨ آلی کہیں وی ہنگامی صورتحال نال نبٹݨ کیتے فعال طور تے کم کریندے پئن۔ اے محکمے چھل اَتے موسم متعلق ݙوجھے چیلنجاں دے وختی حل کوں یقینی بݨاوݨ سانڳے نیڑے رابطے اچ ہن تاں جو مسئلے کوں گھٹ توں گھٹ اَتے شہریاں دی حفاظت کیتی ونڄ سڳے۔
