اسلام آباد۔ 28 جون (اے پی پی) وفاقی وزیر داخلہ محسن نقوی ہفتے اچ ست ݙینھ چووی گھنٹے کم کرݨ آلے نادرا میگا سنٹر بلیو ایریا دا اچانک دورہ کیتا، شہریاں دے مثبت تاثرات تے انچارج اَتے عملے کوں شاباش ݙتی اَتے مزید محنت نال کم کرݨ دی تلقین کیتی۔وزارت داخلہ دی طرفوں جاری بیان موجب، اچانک دورے دے موقع تے وزیر داخلہ محسن نقوی نادرا میگا سنٹر اچ شہریاں کیتے ݙتیاں ڳیاں سہولتاں دا جائزہ گھدا اَتے شناختی کارڈزتے ݙوجھیاں دستاویزات بݨواوݨ کیتے آئے شہریاں نال ملاقات کیتی اَتے انہاں دے تاثرات وی پُچھیے۔ وزیر داخلہ محسن نقوی شناختی کارڈز و ݙوجھیاں دستاویزات بݨواوݨ ویلھے بارے پُچھیا جیں تے شہریاں میگا سنٹر اچ ݙتیاں ڳیاں سہولتاں تے اطمینان دا اظہار کیتا۔ شہریاں آکھیا جو ہݨ انتظار نی کرݨا پوندا، واری وختی آ ویندی اے۔ شہریاں وزیر داخلہ محسن نقوی نال اظہار تشکر وی کیتا اَتے آکھیا جو عملہ وی بہوں تعاون کریندے، تہاݙے آوݨ نال حالات ٻہوں چنڳے تھی ڳئن۔وزیر داخلہ شہریاں دے مثبت تاثرات تے نادرا میگا سنٹر دے شفٹ انچارج اَتے عملے کوں شاباش ݙتی اَتے مزید محنت نال کم کرݨ دی تلقین کیتی۔ وزیر داخلہ محسن نقوی چیئرمین نادرا لیفٹیننٹ جنرل محمد منیرافسر اَتے انہاں دی ٹیم دی کارکردگی دی تعریف کیتی ۔ دورے دے دوران وزیر داخلہ محسن نقوی ویٹنگ ایریا اَتے مختلف کاؤنٹرز تے ونڄ تے شہریاں نال ملاقات کیتی اَتے مسئلے وی پُچھے اَتے شہریاں دے شناختی کارڈز متعلق مسئلے وختی حل کرݨ کیتے موقع تے ہی احکامات جاری کیتے۔ وزیر داخلہ محسن نقوی جدید خودکار مشین دا معائنہ وی کیتا اَتے خودکار شناختی کارڈ نمبر دے اندراج اَتے فنگر پرنٹس دے ذریعے خودکار نظام دے طریقہ کار دا وی مشاہدہ کیتا۔ وزیر داخلہ آکھیا جو ایں سنٹرآ تے خوشی تھئی جو شہریاں کوں انتظار دی زحمت نئیں تھیندی پئی۔ نادرا سنٹر اچ بغیر انتظار گھٹ تھیوݨ خوش آئند اے۔ محسن نقوی آکھیے جو شہریاں کیتے ہر سطح تے سوکھ پیدا کرݨ کیتے اقدامات کریندے رہسوں۔
