راولپنڈی۔ 28 جون (اے پی پی) فیلڈ مارشل سید عاصم منیر آکھیے جو پاکستان اپݨی قومی سالمیت اَتے خودمختاری دے تحفظ کیتے مکمل طور تے تیار اَتے پرعزم اے۔ ہک اہم علاقائی بحری طاقت دے طور تے عالمی سی لائنز آف کمیونیکیشن دے تحفظ کوں یقینی بݨاوݨ کیتے پاک بحریہ دیاں کوششاں لمبے عرصے تے محیط ہن۔ پاک بھارت اڄوکی کشیدگی اچ آپریشن بنیان مرصوص دے دوران پاکستان دیاں مسلح افواج عددی اعتبار اچ خود توں کئی ڳݨا وݙے دشمن دے خلاف فوری اَتے فیصلہ کن ردعمل دا مظاہرہ کیتا۔آئی ایس پی آر دی طرفوں جاری اعلامیہ موجب پاکستان نیول اکیڈمی کراچی اچ شاندار بحری روایتاں دی عکاسی کریندی 123ویں مڈشپ مین اَتے 31ویں شارٹ سروس کمیشن کورس دی کمیشننگ پریڈ منعقد کیتی ڳئی۔ فیلڈ مارشل سید عاصم منیر ایں موقع تے بطور مہمان خصوصی شرکت کیتی۔ نیول اکیڈمی آوݨ تے چیف آف دی نیول سٹاف ایڈمرل نوید اشرف مہمان خصوصی دا استقبال کیتا۔ 123 ویں مڈشپ مین اَتے 31 ویں شارٹ سروس کمیشن کورس دی کمیشننگ ٹرم اچ 127 مڈشپ مین شامل ہن جنہاں اچ بحرین دے 19، عراق دے 4 اَتے فلسطین دے 2 مڈشپ مین موجود ہن۔ شارٹ سروس کمیشن کورس دے 23 کیڈٹس وی کمیشننگ ٹرم دا حصہ ہن۔پریڈ توں خطاب کریندے ہوئیں فیلڈ مارشل سید عاصم منیر کمیشن حاصل کرݨ آلے افسراں اَتے انہاں دے اہل خانہ کوں مبارکباد پیش کیتی۔ انہاں پاکستان اَتے دوست ملکاں دے کیڈٹس کوں معیاری تربیت فراہم کرݨ تے نیول اکیڈمی کوں سراہیا۔ مہمانِ خصوصی آکھیا جو پاکستان نیول اکیڈمی دوست ملکاں دے کیڈٹس کوں بہترین پیشہ ورانہ تربیت فراہم کریندی رہی اے۔ بحرین، عراق، ریاستِ فلسطین، جمہوریہ جبوتی اَتے جمہوریہ ترکیہ دے کیڈٹس دی اج دی کمیشننگ پریڈ اچ موجودگی پاکستان نیول اکیڈمی دے اعلیٰ تربیتی معیار دی مظہر اے۔پاک بحریہ دیاں پیشہ وارانہ صلاحیتاں تے روشنی پیندے مہمان خصوصی آکھیا جو ہک اہم علاقائی بحری طاقت دے طور تے عالمی سی لائنز آف کمیونیکیشن دے تحفظ کوں یقینی بݨاوݨ کیتے پاک بحریہ دیاں کوششاں لمبے عرصے تے مشتمل ہن۔ انہاں پاک بھارت حالیہ کشیدگی تے روشنی پیندے ہوئیں آکھیا جو آپریشن بنیان مرصوص دے دوران پاکستان دیاں مسلح افواج عددی اعتبار اچ خود توں کئی ڳݨا وݙے دشمن دے خلاف فوری اَتے فیصلہ کن ردعمل دا مظاہرہ کیتا۔ اے کارروائی ایں ڳالھ دا واضح ثبوت اے جو پاکستان اپݨی قومی سالمیت اَتے خودمختاری دے تحفظ کیتے مکمل طور تے تیار اَتے پرعزم اے۔ایں توں پہلے اپݨے خطبہ استقبالیہ اچ کمانڈنٹ پاکستان نیول اکیڈمی کموڈور تصور اقبال اکیڈمی اچ کیڈٹس دی تعلیمی اَتے پیشہ وارانہ تربیت دے نمایاں خدوخال تے روشنی پاتی۔ انہاں مضبوط ایمان و کردار اَتے مادرِ وطن کیتے غیر متزلزل لگن دے حامل افسر تیار کرݨ تے نیول اکیڈمی دے کردار دی تعریف کیتی ۔ بعد اچ مہمانِ خصوصی نمایاں کارکردگی دا مظاہرہ کرݨ آلے کیڈٹس اچ انعامات تقسیم کیتے۔ مڈشپ مین عبدالرحمان کوں مجموعی طور تے بہترین کارکردگی تے اعزازی شمشیر دا حقدار قرار ݙتا ڳیا جݙاں جو مڈشپ مین شایانِ حشمت اکیڈمی ڈرک حاصل کیتا۔ آفیسر کیڈٹ محمد عزیر عباس کوں چیئرمین جوائنٹ چیفس آف سٹاف کمیٹی گولڈ میڈل جݙاں جو ایس ایس سی کورس دے آفیسر کیڈٹ چوہدری محمد اعزاز طاہر کوں کمانڈنٹ گولڈ میڈل نال نوازیا ڳیا۔ پروفیشنسی بینر کوارٹر ڈیک سکواڈرن دے ناں رہیا۔تقریب اچ غیر ملکی مندوبین، سرکاری حکام، پاک بحریہ اَتے ݙوجھی دفاعی افواج دے افسراں اَتے کمیشننگ افسراں دے اہل خانہ دی وݙی تعداد شرکت کیتی۔
