اسلام آباد۔ 29 جون (اے پی پی)وفاقی وزیر داخلہ محسن نقوی سی ایم ایچ بنوں پَڄے اَتے شمالی وزیرستان اچ فتنہ الہندوستان دے دہشت گرداں دے بزدلانہ حملے اچ سکیورٹی فورسز دے زخمی جواناں دی عیادت کیتی اَتے زخمی جواناں دے اچے حوصلے دی تعریف کیتی ۔وزارت داخلہ توں جاری بیان موجب ، وزیر داخلہ محسن نقوی زخمی جواناں دی خیریت پُچھی اَتے انہاں دی وختی صحتیابی کیتے دعا کیتی۔ وزیر داخلہ آکھیا جو تہاݙا حوصلہ ݙیکھ تے دہشت گردی دے خلاف جنگ اچ اساݙا عزم مزید تکڑا تھئے ۔ محسن نقوی آکھیا جو تساں پاکستان دے بہادر پُتر او اَتے تہاݙا غیر معمولی جذبہ ݙیکھ تے اساݙا سر فخر نال اُچا تھی ڳئے ۔ وزیر داخلہ آکھیا جو جیں قوم دے کنے تہاݙے جیھے بہادر پُتر ہوون اوں کوں کوئی دشمن شکست نئیں ݙے سڳدا، پوری قوم وطن عزیز دے جری جواناں دے نال اے اَتے سارے تہاݙی جلدی صحتیابی کیتے دعا کریندن۔ آئی جی پولیس خیبرپختونخوا ذوالفقار حمید وی وزیر داخلہ دے رلے زخمیاں دی عیادت کیتی۔
