اسلام آباد۔ 29 جون (اے پی پی) وزیراعظم محمد شہباز شریف بجلی دے بلز اچ شامل پی ٹی وی فیس ختم کرݨ دا اعلان کریندے آکھیے جو بجلی صارفین دے حقوق دا تحفظ کریسوں، “اپݨا میٹر اپݨی ریڈنگ” منصوبے دا اجرا باعث اطمینان اے، اے اقدام شہریاں کوں بااختیار بݨاوݨ دے نال نال ادارہ جاتی اصلاحات دی طرف اہم سنگ میل اے۔ بجلی دی قیمتاں اچ کمی کیتے اقدامات اہم ترجیح اے، توانائی دے شعبے اچ بجلی چوری اہم مسئلہ اے جیں کوں حل کرݨا اے، پاکستان انہاں ملکاں اچ شامل اے جِتھاں تکھے سولرائزیشن تھیندی پئی اے۔ او اتوار کوں اتھاں “اپݨا میٹر اپݨی ریڈنگ ایپ” دی افتتاحی تقریب نال خطاب کریندے پئے ہن۔ وزیراعظم خطاب کریندے آکھیا جو “اپݨا میٹر اپݨی ریڈنگ” سلسلہ وار انقلابی اصلاحات دا حصہ اے جو وزارت بجلی اچ ہک سال توں اویس لغاری اَتے انہاں دی ٹیم دی ݙینھ رات دی محنت دا نتیجہ اے۔ محکمہ بجلی اچ بے پناہ اصلاحات تھئن اڄے مزید سفر طے کرݨا اے۔ اساں ݙسکوز دے بورڈز اچ انقلابی تبدیلیاں کیتیاں، کرپٹ مافیا دے خلاف ٹھوس اقدامات کیتے ڳئے، بجلی دی قیمتاں گھٹ کرݨ کیتے وزیر اَتے ٹاسک فورس بے پناہ محنت کیتی۔ پاکستانی آئی پی پیز نال ڳالھ مہاڑ کیتی اَتے اے اوکھا مرحلہ ہک چنڳے، شفاف طریقے نال طے کیتا ویندا پئے۔وزیراعظم آکھیا جو پاکستان دے بنکاں نال ڳالھ مہاڑ نال گردشی قرضے تے شرح سود تے ڳالھ کیتی ڳئی اَتے اے مرحلہ وی خوش اسلوبی نال طے پاتے۔ وزیراعظم آکھیا جو عالمی منڈی اچ تیل دیاں ݙِٹھیاں قیمتاں دا فیدہ بجلی دی قیمت اچ کمی گھن آوݨ سانڳے استعمال کیتا ڳیا۔ وزیراعظم محمد شہباز شریف آکھیا جو ری بیسنگ دے حوالے نال خدشہ ہئی جو ݙُکھاوݨ تے پنجاہ توں ستر پیسے فی یونٹ وادھا تھی ویسی اساں او طریقہ تلاش کیتا تاں جو ری بیسنگ وی تھی ونجے اَتے قیمت اچ وادھا وی نہ تھیوے۔ ایں حوالے نال اڄ وی اجلاس تھیا۔ اساݙی پوری کوشش اے جو اے وادھا عوام تئیں نہ پڄݨ پاوے۔ وزیراعظم ایں موقع تے پی ٹی وی فیس مکاوݨ دا اعلان کیتا۔وزیراعظم آکھیا جو بجلی دی 500 ارب روپے دی سالانہ چوری وݙا چیلنج اے ایں تے باقاعدہ نال خود جائزہ گھندا پیاں ایں کوں تکھے گھٹ کرݨا اے۔ ݙوجھا چیلنج اے جو بجلی ودھ اے اَتے کھپت گھٹ اے۔ شمسی توانائی سستی ترین بجلی پیدا کرݨ دا ذریعہ اے پاکستان انہاں کجھ ملکاں اچ شمار تھیندے جِتھاں تکھے نال سولرائزیشن تھیندی پئی اے۔ ایں کوں چںڳاں آکھدن ایں دی حوصلہ شکنی نہ کریسوں۔ ہک پاسے اساں سستی بجلی دی ڳالھ کریندوں ، ݙوجھے پاسے سرکاری سطح تے پیدا تھیوݨ آلی بجلی دی کھپت گھٹ اے، اساکوں گھریلو اَتے صنعتی صارف کیتے بجلی دی قیمت گھٹ کرݨی اے اے چومکھی لڑائی اے، اساکوں ایں دا ادراک اے، اساکوں تکھی نال ایں دا حل تلاش کرݨا اے تاں جو پاکستان اچ ترقی و خوشحالی دا سفر تکھے طے تھیوے۔وزیراعظم آکھیا جو ایں “اپݨا میٹر اپݨی ریڈنگ” دا اصل فیدہ صارف کوں تھیسی ، اے ہک انقلابی تبدیلی اے، ایں دا فیدہ ہر ہک گھر چیسی، توقع اے جو ایں دی وزارت مکمل نگرانی کریسی۔ ایں تے پوری ٹیم مبارکباد دی حقدار اے۔ایں موقع تے وزیر توانائی سردار اویس احمد لغاری آکھیا جو صارف کیتے سوکھ تے شفافیت وزیراعظم دا ویژن اَتے ہدایت ہئی۔ ایں ٹیکنالوجی نال صارف ہݨ اپݨی ریڈنگ خود ݙیکھ سڳسی۔ صارفین کوں 110 ارب روپے اوور بلنگ دی مد اچ واپس کیتے ڳئن۔ ہݨ میٹر ریڈر دا اختیار صارف کوں ݙے ݙتا ڳئے۔ انہاں آکھیا جو اساݙی خواہش اے جو وزیراعظم دی نگرانی اَتے رہنمائی اچ عوام دی بہتری کیتے اساں وزیراعظم دے ویژن تے عمل کریندے رہوں۔
