اسلام آباد۔29 جون (اے پی پی) صدرِ مملکت آصف علی زرداری بلوچستان دے ضلع دکی اچ دہشت گرداں دے خلاف کامیاب انٹیلیجنس بیسڈ آپریشن تے سکیورٹی فورسز کوں خراجِ تحسین پیش کریندے آکھیے جو پاکستان دی سکیورٹی فورسز بھارتی سرپرستی اچ تھیوݨ آلی دہشت گردی کوں منڈھوں مکاوݨ کیتے پرعزم اے۔ ایوانِ صدر دے پریس ونگ توں جاری بیان موجب صدر مملکت آصف علی زرداری بھارتی سرپرستی اچ کم کرݨ آلے ݙو دہشت گرداں کوں جہنم واصل کرݨ تے سکیورٹی فورسز دی بہادری دی تعریف کیتی ۔ صدر مملکت آکھیا جو سکیورٹی فورسز دی پیشہ ورانہ مہارت، جرات اَتے قربانی تے پوری قوم کوں ماݨ اے، صدرِ مملکت آکھیا جو پاکستانی قوم اپݨی سکیورٹی فورسز دے رلے کھڑی اے۔ آصف علی زرداری آکھیا جو پاکستان دی سکیورٹی فورسز بھارتی سرپرستی اچ تھیوݨ آلی دہشت گردی کوں منڈھوں مکاوݨ سانڳے پرعزم ہن، صدرِ مملکت اعادہ کیتا جو دہشت گردی دے ناسور دے منڈھوں مُکݨ تئیں اساݙی جدوجہد جاری رہسی۔
