اسلام آباد۔ 30 جون (اے پی پی) وفاقی وزیر خزانہ سینیٹر محمد اورنگزیب چوتھی انٹرنیشنل کانفرنس آن فنانسنگ فار ڈویلپمنٹ وچ پاکستان دی نمائندگی کیتے سنوار کوں سپین روانہ تھی ڳئے۔ وزارت خزانہ توں جاری بیان موجب یکم جولائی توں سپین دے شہر سیویل وچ تھیوݨ آلی ایں چار ݙینھ دی کانفرنس اچ مختلف ملکاں توں رہنماواں، پالیسی سازاں اَتے ترقیاتی ماھراں دی ہک وݙی تعداد شریک تھیسی۔ کانفرنس وچ ترقی پذیر اَتے اُبھردیاں معیشتاں کیتے پائیدار اَتے جدید مالیاتی حکمتِ عملیاں دی تیاری اَتے پائیدار ترقی دے اہداف دے حصول کوں تکھی کرݨ دی کوششاں تے غور تھیسی۔ وزیر خزانہ آپݨے دورے اچ کانفرنس دے مرکزی اجلاساں اَتے مختلف اعلیٰ سطحی سائیڈ ایونٹس وچ شریک تھیسن۔سینیٹر محمد اورنگزیب ہک اہم سیشن “قرض دے بدلے ترقی: ݙی سی ایس فنانسنگ اپروچ” وچ مزمان خصوصی ہوسن، جِتھاں او پاکستان دا مؤقف اَتے ترقیاتی مالیات وچ قرض دی تنظیمِ نو اَتے ݙیپازٹ پروٹیکشن دے امکانات تے گالھ کریسن۔ وزیر خزانہ کانفرنس اچ نجی کاروباراں اَتے فنانس تئیں رسائی اَتے استعمال دے موضوع تے ملٹی سٹیک ہولڈر گول میز مذاکرے دے شریک چیئر ہوسن۔ وزیر خزانہ انٹرنیشنل بزنس فورم پالیسی ݙائیلاگ ولوں اُبھردیاں منڈیاں اَتے ترقی پذیر معیشتاں وچ سرمایہ کاری بارے کریڈٹ ریٹنگز دے کردار تے پالیسی ݙائیلاگ نال کلیدی خطاب کریسن۔ وزیر خزانہ انٹرنیشنل بزنس فورم ولوں نِکے اَتے درمیانے درجے دے کاروبار کیتے مالی معاونت وچ توسیع دے موضوع تے وی خطاب کریسن۔ وزیر خزانہ ترقی کیتے عالمی تعاون دی بحالی و تجدید دے موضوع تے تھیوݨ آلے ہک گول میز مذاکرے نال وی خطاب کریسن۔ وزیر خزانہ یونیسف ولوں بالاں اَتے نینگراں کیتے سرمایہ کاری دی راہ ہموار کرݨ اَتے بالاں کیتے جدید اَتے پائیدار فنانسنگ دے موضوع تے ہک مکالمے وچ وی شریک تھیسن۔ وزیر خزانہ کانفرنس دے موقع تے کئی اہم عالمی شخصیات نال ملاقاتاں وی کریسن، جِنھاں وچ انٹرنیشنل چیمبر آف کامرس دے سیکرٹری جنرل جناب جان ݙینٹن اَتے نیدرلینڈز دے نائب وزیر برائے ترقی جناب اسٹیون کولٹ شامل ہن۔ وفاقی وزیر خزانہ دی ایں کانفرنس وچ شرکت پاکستان دے ایں عزم دی عکاس اے جو ملک جدید مالیاتی حل، عالمی تعاون اَتے ترقیاتی موضوعات تے پاکستان دی مؤثر آواز کوں دنیا تئیں پُڄاوݨ کیتے بھرپور کردار ادا کریسی۔
