اسلام آباد۔ 30 جون (اے پی پی) نائب وزیراعظم اَتے وزیر خارجہ سینیٹر محمد اسحاق ڈار آکھیا جو پاکستان آپݨی خود مختاری اَتے علاقائی سالمیت دے تحفظ کیتے پُرعزم اے، بھارت ہک پاسوں سندھ طاس معاہدہ معطل نی کر سڳدا، بھارت پاݨی کوں بطور ہتھيار استعمال کرݨ چاھندے، تنازعہ جموں و کشمیر عالمی سطح تے تسلیم شدہ مسئلہ اے، مسئلہ کشمیر دے پرامن حل نال خطے وچ امن تھیسی، فلسطینیاں نال انصاف دے بغیر مشرق وسطیٰ وچ امن نی تھی سڳدا، تجارت اَتے بیرونی سرمایہ کاری دا فروغ حکومت دی پہلی ترجیحات وچ شامل اے۔ اے ڳالھیں انہاں انہاں سنوار کوں انسٹی ٹیوٹ آف سٹریٹجک سٹڈیز وچ ہک تقریب نال خطاب کریندیں ہوئیں کیتی۔ نائب وزیراعظم آکھیا جو اساں مسئلہ کشمیر دا اقوام متحدہ دی سلامتی کونسل دی قرارداداں اَتے کشمیری عوام دی امنگاں دے مطابق حل چاھندوں، بھارت پہلگام دا کوڑا ڈرامہ رچایا اَتے فالس فلیگ آپریشن دی اوٹ وچ پاکستان تے جارحیت مسلط کیتی حالاں جو پاکستان بھارتی جارحیت دا تکڑا اَتے مؤثر جواب ݙتا۔ محمد اسحاق ݙار آکھیا جو بھارت عالمی قانوناں دی کھلی خلاف ورزی کریندا پئے، بھارت پاکستان تے آپݨی مرضی مسلط نی کر سڳدا، ایں کیتے او اپݨیاں پالیسیاں تے نظرثانی کرے۔ انہاں آکھیا جو اساں ایران دے حق دفاع دی بھرپور حمایت کریندوں۔ نائب وزیراعظم اَتے وزیر خارجہ آکھیا جو اساں اسرائیل اَتے ایران وچال جنگ بندی دا خیر مقدم کریندوں، اسرائیل فلسطینیاں دی نسل کشی کریندا پئے، نِہتّے فلسطینیاں دے خلاف اسرائیلی بربریت دی تریخ وچ مثال نی مِلدی۔ انہاں آکھیا جو پاکستان کوں مشرق وسطیٰ دی اڄوکی صورتحال تے تشویش اے، غزہ وچ انسانیت سوز مظالم کیتے ویندے پئن۔سینیٹر محمد اسحاق ڈار آکھیا جو پاکستان مسئلہ فلسطین دے ݙو ریاستی حل دا حامی اے، عالمی برادری غزہ وچ اسرائیلی مظالم بند کرݨ وچ آپݨا کردار ادا کرے۔ انہاں آکھیا جو پاکستان ایران اسرائیل جنگ بندی دا خیرمقدم کیتے، ایران دے جوہری مسئلہ دا حل گالھ مہاڑ نال کݙھیا ونجے۔ نائب وزیراعظم آکھیا جو پاکستان عالمی برادری دا ہک ذمہ وار رُکن اے اَتے او ایران دے قانونی مؤقف دی ہمیشہ تائید کریندا رہیے۔ انہاں آکھیا جو افغان حکومت یقینی بݨاوے جو اوندی سرزمین کہیں ٻئے ملک دے خلاف دہشت گردی کیتے استعمال نہ تھیوے، پاک چین سٹریٹجک شراکت داری مضبوط توں مضبوط تر تھیندی پئی ہے۔ نائب وزیراعظم اَتے وزیر خارجہ سینیٹر محمد اسحاق ڈار آکھیا جو پاکستان افغانستان دے نال تعلقات کوں بہتر بݨاوݨ کیتے عمل پیرا اے۔
